Հայաստանի Հանրապետությունում վարորդական իրավունքի վկայական ստանալու տեսական քննության դրական արդյունքների վավերականության ժամկետը սահմանված մեկ տարվա փոխարեն կպահպանվի երկու տարի։ Կառավարության հուլիսի 2-ի նիստում համապատասխան որոշման նախագիծը ներկայացրել է Ներքին գործերի նախարար Արփինե Սարգսյանը։
Որոշման պատճառները և վիճակագրական հիմնավորումը Ըստ ՆԳՆ հիմնավորման՝ գործող մեկամյա ժամկետի փոփոխությունը պայմանավորված է երկու հիմնական գործոնով.
-
Հերթերի ավելացում. Հաշվառման-քննական կենտրոններում դիմելիության աճի պատճառով քաղաքացիները մեկ տարվա ընթացքում չեն հասցնում հերթագրվել և հանձնել գործնական քննությունը։
-
Գործնական փուլի անցողիկության ցածր մակարդակ. Գործնական քննությունից բացասական գնահատական ստացողների մեծ թվի պատճառով քաղաքացիները չեն տեղավորվում մեկամյա վավերականության ժամկետում, ինչի հետևանքով ստիպված են լինում կրկին հանձնել նաև տեսական քննությունը։
Բացի այդ, արձանագրվել է միտում, որ քաղաքացիները երկարաձգում են ավտոդպրոցներում ուսումնառության ժամկետը՝ գործնական հմտությունները բարելավելու նպատակով, ինչը ևս պահանջում է քննական փուլերի միջև ընկած ժամանակահատվածի ընդլայնում։
Հարցաշարերի դասակարգում ըստ տրանսպորտային միջոցների կարգերի Նոր որոշմամբ վերանայվելու են նաև տեսական քննության հարցաշարերը։ Գործող համակարգում թեթև մարդատար մեքենաների (B կարգ) հարցաշարերում ներառված էին ավտոբուսների կամ բեռնատարների վարմանը վերաբերող մասնագիտական հարցեր։ Բարեփոխումից հետո հարցաշարերը կստանդարտացվեն և կհամապատասխանեցվեն բացառապես տվյալ կարգին ու ենթակարգին։
Ուժի մեջ մտնելու ժամկետը Սույն կարգավորումներն ուժի մեջ կմտնեն 2026 թվականի սեպտեմբերի 1-ից։