Պայմանագրային զինծառայողը Վանաձորի ամայի տարածքում է կրակել մանր գնդիկներով լիցքավորված օդաճնշիչ ատրճանակով։ Տեղեկությունը հայտնում է ՀՀ քննչական կոմիտեն։
Ավելի վաղ հայտնել էինք, թե Վանաձորում կրակոցներ են հնչել, իսկ կրակողը եղել է ՀՀ ՊՆ N զորամասի պայմանագրային զինծառայող, Լոռու մարզի բնակիչ 35-ամյա Ֆրունզիկ Ս.–ն։ Զինծառայողն ինքնակամ ներկայացրել էր ատրճանակը ու հայտնել, որ ատեստավորման քննության է պատրաստվում, ուղղակի գետնին է կրակել մի քանի անգամ։ Կայքում նյութին կից նաև լուսանկար է հրապարակված, որտեղ երևում է բակային տարածք ու բազմաթիվ կրակոցների հետքեր։
«Պայմանագրային զինծառայողը Վանաձոր քաղաքի ամայի տարածքում է կրակոցներ արձակել` համոզված լինելով, որ մոտակայքում քաղաքացիներ չկան։ Զենքը պատկանում է իրեն։ Տղամարդը մի քանի անգամ մանր գնդիկներով լիցքավորված օդաճնշիչ ատրճանակով կրակել է գետնին: Այդ ընթացքում նրան է մոտեցել տարածքում շրջիկ ծառայություն իրականացնող ոստիկանը, ում զինծառայողն ինքնակամ ներկայացրել է ձեռքին եղած օդաճնշիչ ատրճանակը և հայտնել, որ այն պատկանում է իրեն»,– հայտնեցին ՔԿ–ից։
Քննչական մարմինը նաև հայտնում է, որ մամուլում որպես դեպքի վայր ներկայացված լուսանկարն իրականությանը չի համապատասխանում:
Դեպքի հանգամանքները պարզելու ուղղությամբ նախաձեռնվել է քրեական վարույթ։
Sputnik Արմենիա