Իրանում կառավարության դեմ բողոքի նոր ալիք է հասունանում՝ առաջին ալիքի կոշտ ճնշման և հազարավոր մարդկանց մահվան պատճառով առաջացած վրդովմունքի հետևանքով, հայտնում է The Wall Street Journal-ը (WSJ)՝ հղում անելով բնակիչներին, տեղական թղթակիցներին և կազմակերպությունների հայտարարություններին։
Ըստ թերթի՝ մարդիկ բացահայտորեն արտահայտում են իրենց դժգոհությունը իշխանությունների նկատմամբ՝ չնայած ռիսկերին. օրինակ՝ հուղարկավորությունների և հոգեհանգստի արարողությունների ժամանակ սգացող ընտանիքի անդամները հակակառավարական կարգախոսներ են բղավում։ Դպրոցականները հրաժարվում են հայրենասիրական երգեր երգել, իսկ բժշկական աշխատողները հրապարակայնորեն դատապարտում են բողոքի ցույցերի ժամանակ տուժածներին բուժած գործընկերների ձերբակալությունները։ Միևնույն ժամանակ, որոշ տեղական ակտիվիստական խմբեր բացահայտորեն կոչ են անում տապալել Իրանի գերագույն առաջնորդ այաթոլլա Ալի Խամենեիին։
Թերթը նշում է, որ դժգոհությունը մեծանում է տարածաշրջանում ԱՄՆ ռազմական ներկայության աճի ֆոնին։
Մաշհադ, Թավրիզ և Շիրազ քաղաքներում՝ զոհված դասընկերների համար ուսանողների կողմից կազմակերպված հիշատակի միջոցառումների ժամանակ, հավաքվածները վանկարկել են. «Մեռնող ուսանողը չի հանդուրժի նվաստացումը», հայտնում է WSJ-ն։ Հրատարակության համաձայն՝ Շիրազի բժշկական ուսանողներն այս շաբաթ մի քանի օր նստացույց են անցկացրել՝ վանկարկելով կարգախոսներ՝ ի պաշտպանություն զոհված ցուցարարների և ձերբակալված բժիշկների։
Wall Street Journal-ն ուշադրություն է հրավիրել իրանցի հայտնի դերասանուհի Էլնազ Շաքերդուստի բողոքի ցույցի վրա. բողոքի առաջին ալիքի ճնշումից հետո նա հայտարարել էր կինոարդյունաբերությունից հեռանալու մասին։
«Ես այլևս երբեք չեմ նկարահանվի մի երկրում, որտեղից արյան հոտ է գալիս»,- գրել էր նա Instagram-ի իր էջում։
Իրանում իրավիճակը սրվել էր 2025 թվականի դեկտեմբերի վերջին ազգային արժույթի արագ արժեզրկման պատճառով զանգվածային բողոքի ցույցերի ալիքից հետո: ԱՄՆ նախագահը բազմիցս հայտարարել է Իրանի վրա հարձակվելու հնարավորության մասին: Իրանի գերագույն առաջնորդը փետրվարի 1-ին հայտարարել էր, որ իր երկրի դեմ ԱՄՆ-ի նոր ագրեսիան կարող է հանգեցնել տարածաշրջանային հակամարտության: Փետրվարի 2-ին Իրանի նախագահ Մասուդ Փեզեշքիանի գրասենյակը հրապարակել էր զանգվածային բողոքի ցույցերի ընթացքում 2985 զոհվածի անունների նախնական ցանկը։
Armenia Today