«Ապրելու երկիր» կուսակցության նախագահ Մանե Թանդիլյանի ֆեյսբուքյան գրառումը
Մեծ ոգևորությամբ և երախտագիտությամբ եմ հետևել Բաքվում մեր հայրենակիցների պատանդառման 1000-րդ օրվան նվիրված ասուլիսին մասնակցած ԱՄՆ կոնգրեսականների ելույթներին։
Խիստ խորհրդանշական է, որ էթնիկ զտման ենթարկված արցախահայության իրավունքների պաշտպանության, Արցախում իրականացվող մշակութային ցեղասպանության և հայ գերիների անհապաղ ազատ արձակման մասին այսօր ավելի բարձր ու հետևողական են խոսում օտարերկրացի գործիչները։ Մինչդեռ պաշտոնական Երևանը խաղաղության իր օրակարգում անամոթաբար չի ներառում այդ հիմնահարցերը։
Հատկանշական է նաև ԱՄՆ կոնգրեսականներից լսել մեր կողմից մշտապես բարձրաձայնվող այն պնդումը, որ չի կարող լինել տևական խաղաղություն, քանի դեռ յուրաքանչյուր հայ ռազմագերի և քաղաքական բանտարկյալ ազատ չի արձակվել ադրբեջանական գերությունից ու չի վերադարձել իր ընտանիքի մոտ։
Իմ խորին շնորհակալությունն ու աջակցությունն եմ հայտնում բոլոր նրանց, ովքեր մոռացության չեն տալիս, որ 21-րդ դարում արդեն ավելի քան 1000 օր է, ինչ առնվազն 19 հայ շարունակում է մնալ ադրբեջանական գերության մեջ՝ ենթարկվելով քաղաքական հաշվեհարդարի, կրելով ծանրագույն պատժաչափեր՝ ընդհուպ մինչև ցմահ ազատազրկում։
Վստահ եմ՝ յուրաքանչյուր նման ելույթ, յուրաքանչյուր հետևողական քայլ կարող է լսելի դառնալ և բեկումնային դեր ունենալ մեր գերիների ազատ արձակման գործընթացում։
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: