Հայատանում բարձր են գնահատում հայ-ռուսական համագործակցության պատմությունը և համոզված են, որ երկկողմ փոխգործակցության հետագա զարգացումը բխում է երկու երկրների շահերից, իսկ առկա տարաձայնությունները հաղթահարելի են։ Այս մասին Երևանի «Դվին» համալիրում Ռուսաստանի օրվա առթիվ կազմակերպված ընդունելության ժամանակ հայտարարել է Հայաստանի փոխվարչապետ Մհեր Գրիգորյանը։
«Երկու երկրների համագործակցության կուտակված փորձը երկարաժամկետ, հիմնարար և արժեքավոր ակտիվ է, որը կարևոր է պահպանել միջազգային հարաբերությունների ցանկացած դասավորության դեպքում… Մենք բարձր ենք գնահատում մեր համագործակցության պատմությունը և համոզված ենք, որ երկկողմ փոխգործակցության հետագա զարգացումը բխում է երկու երկրների շահերից և նպաստում է տարածաշրջանում կայունության ու բարեկեցության ամրապնդմանը»,-նշել է Գրիգորյանը։
Ռուսաստանի Դաշնությունը, նրա խոսքով, կարևոր տեղ է զբաղեցնում համաշխարհային քաղաքականության, տնտեսության և մշակույթի մեջ, իսկ նրա ձեռքբերումները վկայում են բազմազգ ժողովրդի ստեղծագործական աշխատանքի և տաղանդի մասին։ Հայաստանն ու Ռուսաստանը կապված են դարավոր պատմական հարաբերություններով՝ հիմնված փոխադարձ հարգանքի, ամուր բարեկամության և մեր ժողովուրդների միջև սերտ հումանիտար կապերի վրա։
«Հույս ենք հայտնում, որ առկա հարցերն ու տարաձայնությունները հաջողությամբ կհաղթահարվեն բաց երկխոսության շնորհիվ, իսկ Հայաստանի և Ռուսաստանի միջև հարաբերություններն այսուհետ ևս կզարգանան փոխըմբռնման, փոխադարձ հարգանքի և բարիդրացիության ոգով՝ ի բարօրություն մեր պետությունների ու ժողովուրդների»,-նշել է Գրիգորյանը։
Նա Ռուսաստանի Դաշնությանը մաղթել է խաղաղություն, բարգավաճում և հաջողություններ, իսկ Ռուսաստանի քաղաքացիներին՝ երջանկություն, բարեկեցություն և վստահություն վաղվա օրվա հանդեպ։
Չնայած Ռուսաստանի հետ լարված հարաբերություններին` ընդունելությանը ներկա էր ոչ միայն փոխվարչապետ Մհեր Գրիգորյանը (որն ավանդաբար ներկա է լինում այս միջոցառմանը՝ խմբ․), այլև ԱԺ նախագահ Ալեն Սիմոնյանը, փոխնախագահ Ռուբեն Ռուբինյանը, էկոնոմիկայի նախարար Գևորգ Պապոյանը, տարածքային կառավարման և ենթակառուցվածքների նախարար Դավիթ Խուդաթյանը։
Ռուսաստանի օրն ամեն տարի նշվում է հունիսի 12-ին, այն կապված է 1990 թվականին Պետական ինքնիշխանության մասին հռչակագրի ընդունման հետ։
Sputnik Արմենիա