Անվճար բժշկական հետազոտություն՝ ամուսնությունից առաջ. ինչ է առաջարկում Առողջապահության նախարարությունը ամուսնանալ պատրաստվողներին
Բաժանորդագրվեք Zarkerak.am-ի տելեգրամ ալիքին։
Տեղեկացվա՞ծ եք, որ Հայաստանում գործում է զագսավորման դիմում ներկայացնելուց հետո երեք ամսվա ընթացքում զույգի համար անվճար բժշկական հետազոտության ծրագիր:
ՀՀ ԱՆ Մոր և մանկան առողջության պահպանման վարչության մայրական և վերարտադրողական առողջության պահպանման բաժնի պետ Ռուզան Մարտիրոսյանը Zarkerak.am-ի հետ զրույցում նշեց, որ թեև ծրագիրը առողջապահության նախարարի հրամանով գործում է դեռ 2020 թվականից, բայց դրա վերաբերյալ հանրությունը բավարար չափով տեղեկացված չէ և այնքան մեծ տարածում չունի, ինչպես անպտղության հաղթահարման ծրագիրը:
Մարտիրոսյանը ընդգծեց, որ այն ներդնելիս հաշվի է առնվել մեր որոշ ազգային սովորությունները, մասնավորապես՝ բժշկի գնում ենք միայն գանգատների դեպքում կամ երբ դանակը ոսկորին է հասնում.«Այս ծրագրի նպատակը հղիության պլանավորումն է, խորհրդատվությունների և հետազտությունների միջոցով հնարավոր խնդիրների կանխարգելումն է՝ հետագայում առանց խոչընդոտների հղիություն ունենալու համար»:
Նա նշեց, որ թեև երեք ամիսը բավարար չէ հասկանալու համար՝ զույգի մոտ կա անպտղություն, թե ոչ, բայց առաջարկվող հետազոտությունները նվազեցնում են դրա ռիսկերը.«Ծրագիրն ընդգրկվում է կանանց մինչամուսնական խորհրդատվության, որովայնի օրգանների և վահանաձև գեղձի գերձայնային հետազոտություն, սեռավարակների ախտորոշում, իսկ բժշկական ցուցումների դեպքում նաև անհրաժեշտ այլ հետազոտությունների կազմակերպում» ,- նշեց մեր զրուցակիցը, ընդգծելով, որ անհրաժեշտության դեպքում կարող են կատարվել նաև պատվաստումներ, դեղորայքի նշանակում ևս իրականացվում է:
Տղամարդկանց դեպքում կատարվում է սպերմոգրամա, ստուգվում են որոշ սեռավարակներ, կարող են խորհրդատվություն ստանալ վնասակար սովորություններից հրաժարվելու, կյանքի ռեժիմում առողջ ապրելակերպի ընդգրկման վերաբերյալ և այլն:
Անվճար հետազոտության համար դիմումը մուտքագրելու վերաբերյա ՔԿԱԳ մարմի կողմից տրված գրությունը զույգը պետք է ներկայացնի առողջության պահպանման առաջնային օղակ՝ պոլիկլինիկա. «Զույգերի առումով թվային սահմանափակում չկա: Սակայն նախարարությունը վիճակագրություն չի վարում դիմած զույգերի վերաբերյալ»:
Ռուզան Մարտիրոսյանը նաև ընդգծեց, որ այս ծրագրով հանրության մեջ փորձում են ներդնել զույգով բժշկին դիմելու մշակույթը: