«Ընտրարշավի ողջ ընթացքում եղել ենք բոլոր մարզերում ու քաղաքներում, մեկ խնդիր ենք ունեցել մեր առջեւ՝ հանրությանը փաստերով ու օրինակներով բացատրել, որ այս իշխանությունը ազգային անվտանգության սպառնալիք է: Այս իշխանությունը պետք է հեռացնել, այլ ոչ թե նոր հնարավորություն տալ երկիրը նոր փորձանքների տանելու համար».- այսօր «Հայաստան» դաշինքի ամփոփիչ նախընտրական հավաքի ժամանակ ասաց պատգամավորի թեկնածու, ՀՅԴ Հայաստանի գերագույն մարմնի ներկայացուցիչ Իշխան Սաղաթելյանը:
Ըստ նրա՝ իրենք ժողովրդին կախարդական փայտիկ չեն խոստանում, բայց ասում են. «Մենք գիտենք բոլոր խնդիրների լուծման բանալին եւ լուծելու ենք: Մենք ասում ենք՝ միասին կարող ենք ստեղծել անվտանգ ու մրցունակ պետություն, որտեղ հայ մարդը կլինի պաշտպանված, իսկ քաղաքացին արժանապատիվ ու բարեկեցիկ: Կարող ենք միասին, ինքնության հիման վրա կառուցել ազգային ու արժանապատիվ պետություն…եւ շատ հստակ ասում ենք՝ Հայաստանում ադրբեջանական տարածքներ չկան, Ադրբեջանի զորքերը ՀՀ տարածքից պետք է դուրս գան, թշնամու պահանջով Սահմանադրություն չենք փոխելու, Հայաստանում ադրբեջանցիներ չեն բնակեցվելու»:
Արփինե ՍԻՄՈՆՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: