Մեր սեփական երկաթուղին մենք չենք կարող թողնել, որ մնա մետաղի ջարդոնի կարգավիճակում, հայտարարել է Փաշինյանը
ԵՐԵՎԱՆ, 28 մայիսի․/ԱՌԿԱ/. ՀՀ տնտեսությանը ոչ մի բան չի սպառնում, ՀՀ տնտեսությանը սպասվում են միլիարդների ներդրումներ, հայտարարել է ՀՀ վարչապետ Նիկոլ Փաշինյանը։
«Կան գործոններ, որոնք որոշակի նյարդ են առաջացնում Հայաստան-Ռուսաստան հարաբերություններում, մասնավորապես երկաթուղու հետ կապված խնդիրը», – ասաց Փաշինյանն այսօր ճեպազրույցի ժամանակ։
Նրա խոսքով՝ Հայաստանը պետք է օգտագործի այս պատմական շանսը։
«Մեր սեփական երկաթուղին մենք չենք կարող թողնել, որ մնա մետաղի ջարդոնի կարգավիճակում։ Ինքը տարանցման մեծ պոտենցիալ ունի, և մենք ՌԴ գործընկերների հետ աշխատելու ենք, որպեսզի փոխշահավետ լուծումներ գտնվեն», – նշեց վարչապետը։
Նա ընդգծեց, որ Հայաստանը Ռուսաստանի հետ չի մտնելու լեզվակռվի և բանավեճի մեջ։
«Աշխատանքային կարգով բոլոր, այդ թվում՝ ամենապրոբլեմատիկ հարցերը քննարկելու ենք, բայց նաև մենք չենք պատրաստվում հրաժարվել մեր ռազմավարությունից․ Հայաստանն այլևս չի մտնելու մի վիճակի մեջ, որ այլընտրանք չունենա», -ասաց Փաշինյանը։