ՄԵՂՐԻ ՀԱՄԱՅՆՔԻ ՂԵԿԱՎԱՐ ԽԱՉԱՏՈՒՐ ԱՆԴՐԵԱՍՅԱՆԻ ՈՒՂԵՐՁԸ ՀԱՆՐԱՊԵՏՈՒԹՅԱՆ ՕՐՎԱ ԱՌԹԻՎ
Սիրելի՛ հայրենակիցներ, Մեղրի համայնքի բնակիչներ
Սրտանց շնորհավորում եմ մայիսի 28-ի՝ Առաջին Հանրապետության օրվա առթիվ։
1918 թվականի այս պատմական օրը դարձավ մեր ժողովրդի անկոտրում կամքի, ազատ ապրելու վճռականության և ազգային ինքնության վերածննդի խորհրդանիշը։ Դարերի փորձությունների միջով անցած հայ ժողովուրդը կարողացավ կերտել անկախ պետականություն՝ ապացուցելով, որ հայրենիքի հանդեպ սերն ու միասնականությունը անպարտելի ուժ են։
Մայիսի 28-ը ոչ միայն պատմական հիշողություն է, այլ նաև պատասխանատվություն՝ պահպանելու մեր պետականությունը, ամրապնդելու ազգային արժեքները և համախմբված շարունակելու մեր երկրի զարգացման ճանապարհը։ Այս օրը մեզ հիշեցնում է, որ յուրաքանչյուր սերունդ իր ներդրումն ունի հզոր, անվտանգ և արժանապատիվ հայրենիք կառուցելու գործում։
Թող այս տոնը յուրաքանչյուր հայի սրտում զորացնի հավատը վաղվա օրվա հանդեպ, պարգևի խաղաղություն, համերաշխություն և նոր հաջողություններ մեր համայնքին ու ամբողջ հայրենիքին։
Մաղթում եմ ձեզ և ձեր ընտանիքներին առողջություն, բարօրություն ու անսպառ ուժ՝ ի շահ մեր համայնքի և Հայաստանի Հանրապետության։
Կեցցե՛ Հայաստանի Հանրապետությունը, Կեցցե՛ հայ ժողովուրդը։