Տեղեկությանն անդրադարձել է նաև ԿԳՄՍ նախարար Ժաննա Անդրեասյանը։
ԵՐԵՎԱՆ, 24 մայիսի – Sputnik. Սերժ Թանկյանը հերքել է Նիկոլ Փաշինյանի հայտարարությունը, թե հուլիսին System of a Down-ը Երևանում համերգ է տալու։
«SOAD-ը Երևանու՞մ։ Սրա հետ կապված, կարծես, շփոթմունք կա։ Մենք պլանավորում էինք համերգ ունենալ այս տարվա հուլիսին, բայց որոշեցինք հետաձգել այն լոգիստիկ և ժամանակային բարդությունների պատճառով։ Մենք դրա մասին կհայտարարենք, երբ պարզ լինի նոր ժամկետը»,- գրել է Թանկյանը «Ինստագրամում»։
«Այո, քննարկել ենք այս տարվա հուլիսին Երևանում համերգ կազմակերպելու տարբերակը, ինչի մասին էլ խոսել է վարչապետը։ Այդուհանդերձ որոշ կազմակերպչական և ժամանակային հարցեր հնարավոր չեն դարձնում հուլիսին համերգի կազմակերպումը։ Բայց համերգը մնում է օրակարգում, և առաջիկայում խմբի հետ կհամաձայնեցնենք դրա անցկացման ժամկետները»,-գրել է նա։
ՔՊ-ի վարչապետի թեկնածուն համերգի մասին ասել էր երեկ քարոզարշավի ժամանակ։
Հիշեցնենք, որ նախորդ անգամ խումբը Երևանում համերգ է տվել 2015 թվականին: Այն տեղի է ունեցել Հանրապետության հրապարակում և նվիրված է եղել Հայոց ցեղասպանության 100-րդ տարելիցին: