Հայաստանում շարունակվում է սպառողական և պարենային գների աճը։ Հայաստանի վիճակագրական կոմիտեի հրապարակած տվյալների համաձայն՝ 2026 թվականի ընթացքում գնաճային ճնշումը հետևողականորեն ուժեղանում է։ Հունվարին սպառողական գնաճը կազմել է 3,8%, փետրվարին՝ 4,3%, մարտին՝ 4,5%, իսկ ապրիլին արդեն հասել է 5,3%-ի։ Սննդամթերքի շուկայում աճն ավելի արագ է եղել՝ հունվարի 5,8%-ից ապրիլին հասնելով 9,7%-ի։ Մսամթերքի շուկայում զգալի թանկացումներ են արձանագրվել։ Տավարի և հորթի միսը թանկացել է 20,5%-ով, խոզի միսը՝ 12,5%-ով, իսկ գառան և այծի միսը՝ 14,9%-ով։ Սառեցված ձուկը թանկացել է 22,5%-ով, իսկ չորացված և ապխտած ձկնամթերքը՝ 42,7%-ով։ Միաժամանակ գյուղատնտեսության ոլորտում արձանագրվել է անկում։ 2026 թվականի առաջին եռամսյակում գյուղատնտեսական համախառն արտադրանքի ծավալը կրճատվել է 5,2%-ով, իսկ բուսաբուծության ոլորտում անկումը կազմել է 16,6%։ Փորձագիտական շրջանակներում նշվում է, որ իշխող թիմի կողմից Ռուսաստանի հետ հարաբերությունների հնարավոր խզումը կամ տնտեսական համագործակցության սահմանափակումը կարող է լրացուցիչ ճնշում ստեղծել հայկական տնտեսության և սպառողական շուկայի վրա։