Քաղաքականություն
19.05.2026 | 20:12
Հրազդանի քաղաքապետ Սևակ Միքայելյանը հայտնել է, որ Հրազդանում կառուցվող արհեստական բանականության (AI) գործարանի ծրագրի երկրորդ փուլը հաստատվել է, որի շրջանակում նախատեսվում է ևս 4 միլիարդ դոլարի ներդրում։ Նրա խոսքով՝ նախագիծը կարող է Հրազդանը դարձնել տարածաշրջանային տեխնոլոգիական և նորարարական կարևոր կենտրոն։
«Արդեն տեղյակ եք, որ Հրազդանում կառուցվում է արհեստական բանականության (AI) գործարան՝ 500 միլիոն դոլար ներդրմամբ։
Ուրախությամբ ցանկանում եմ տեղեկացնել, որ հաստատվել է ծրագրի երկրորդ փուլը, որի շրջանակում ներդրվում է 4 միլիարդ դոլար։
Սա աննախադեպ հնարավորություն է ոչ միայն մեր համայնքի, այլև ողջ Հայաստանի համար՝ Հրազդանը տարածաշրջանային տեխնոլոգիական և նորարարական կարևոր կենտրոն դարձնելու ուղղությամբ։
Հատկանշական է, որ այսօր աշխարհում գործում են նմանատիպ ընդամենը 13 AI գործարաններ, և 14-րդը կառուցվում է հենց Հրազդանում։
Նշեմ նաև, որ AI գործարանի կառուցման և հետագա գործունեության առանցքային տեխնոլոգիական գործընկերն է NVIDIA ընկերությունը, որի շուկայական կապիտալիզացիան համաշխարհային շուկայում գնահատվում է շուրջ 4.6 տրիլիոն դոլար։
Կառուցում ենք ապագայի Հրազդանը՝ միասին»,- գրել է նա։