Իրավաբանների միջազգային հանձնաժողովը արձանագրել է՝ Բաքվում հայերի դեմ դատավարությունները չեն համապատասխանում միջազգային իրավունքի չափանիշներին. Աննա Մելիքյան

«Իրավունքների պաշտպանություն առանց սահմանների» ՀԿ-ի իրավական հարցերով փորձագետ Աննա Մելիքյանի ֆեյսբուքյան գրառումը

Քանի դեռ մենք զբաղված ենք ընտրարշավով, երեկ Իրավաբանների միջազգային հանձնաժողովը (International Commission of Jurists) զեկույց է հրապարակել Ադրբեջանում արդարադատության համակարգի խնդիրների վերաբերյալ (Justice Under Pressure: Independence of Lawyers and the Right to a Fair Trial in Azerbaijan):

Քննարկելով համակարգում առկա անթիվ խնդիրներ ու խախտումներ՝ զեկույցի հեղինակները առանձին վերլուծում են Բաքվում դատվող հայերի դեմ դատերը՝ միջազգային չափանիշների լույսի ներքո։

Հստակ եզրահանգում են, ինչպես և մենք մինչ այդ, որ այդ դատավարությունները չեն համապատասխանում մարդու իրավունքների միջազգային իրավունքի չափանիշներին։

Արձանագրել են մասնավորապես, որ․
– քաղաքացիական անձինք դատվել են ռազմական դատարանում․
– ամբաստանյալների՝ իրենց ընտրությամբ փաստաբան ունենալու իրավունքը խախտվել է․
– գործի նյութերը չեն տրամադրվել կամ տրամադրվել են այնպիսի լեզվով, որը մեղադրյալները չեն հասկանում․
– պաշտպանների միջնորդությունները մերժվել են առանց հիմնավորման․
– թարգմանությունը թերի է եղել կամ չի ապահովվել․
– հանրության հասանելիությունը, այդ թվում՝ դիվանագետների համար, չի ապահովվել։