Ուկրաինայի իշխանությունները չեն աջակցում Գերմանիայի նախկին կանցլեր Գերհարդ Շրյոդերի թեկնածությանը՝ որպես Եվրամիության կողմից Ռուսաստանի հետ բանակցող։ Այս մասին լրագրողներին հայտնել է Ուկրաինայի արտաքին գործերի նախարար Անդրեյ Սիբիհան Բրյուսելում կայանալիք ԵՄ արտաքին գործերի նախարարների հանդիպումից առաջ, գրում է DW-ի ռուսական ծառայությունը։
Նրա կարծիքով՝ կան «շատ այլ արժանի առաջնորդներ», որոնք կարող են կատարել այդ գործառույթը։
Ավելի վաղ ԵՄ արտաքին գործերի և անվտանգության քաղաքականության հարցերով հանձնակատար Կայա Կալլասը նույնպես մերժել էր Շրյոդերի թեկնածությունը։ Նա նշել էր՝ ՌԴ նախագահ Վլադիմիր Պուտինը ցանկանում է, որ նախկին կանցլերը ներկայացնի ԵՄ-ն Ռուսաստանի հետ բանակցություններում, որպեսզի նա կարողանա արդյունավետորեն «նստել սեղանի երկու կողմում»։
«Եթե մենք Ռուսաստանին տանք մեր անունից բանակցող նշանակելու իրավունք, ապա, ինչպես հասկանում եք, դա այնքան էլ խելամիտ չի լինի»,- ասել է Կալլասը:
Մայիսի 9-ին Կրեմլի լրագրողների հետ մամուլի ասուլիսում Պուտինը Շրյոդերին անվանել էր ԵՄ-ից «նախընտրելի» թեկնածու՝ Ուկրաինայի դեմ Ռուսաստանի պատերազմը դադարեցնելու բանակցությունների համար: Պուտինը նաև հայտարարել էր, որ Մոսկվան բաց է երկխոսության համար, բայց Բրյուսելը պետք է ընտրի մի բանակցողի, որը «մեր մասին որևէ տհաճ բան չի ասել»: Ռուսաստանը, նրա խոսքով, «միշտ» հարգալից է խոսել ԵՄ-ի հետ:
Գերմանիայի իշխող կոալիցիան քննարկում է նախագահ Ֆրանկ-Վալտեր Շտայնմայերի մասնակցությունը որպես ԵՄ ներկայացուցիչ Ռուսաստանի հետ բանակցություններում, հաղորդել է Der Spiegel-ը: Աղբյուրների համաձայն՝ Գերմանիայի կառավարությունը չի կարծում, որ նախկին կանցլերը կարող է միայնակ կատարել նման առաջադրանք, սակայն Բեռլինում Շրյոդերի և Շտայնմայերի «միջնորդական զույգն» անվանում են «հետաքրքիր տարբերակ»:
Մինչ այդ, Ռուսաստանի և Ուկրաինայի միջև բանակցություններ պաշտոնապես չեն ընթանում։ Սա հաստատել է Ռուսաստանի արտաքին գործերի նախարար Սերգեյ Լավրովը ապրիլի կեսերին։
Շրյոդերը համարվում է Պուտինի անձնական ընկերը. նրանք ծանոթացել են 2000-ականներին և շարունակել շփվել կանցլերի պաշտոնից Շրյոդերի հեռանալուց հետո։ Գերմանացի քաղաքական գործիչը մի քանի տարի նաև եղել է ռուսական «Ռոսնեֆտ»-ի տնօրենների խորհրդի նախագահ՝ հրաժարական տալով միայն 2022 թվականին՝ Ուկրաինայի վրա Ռուսաստանի լայնածավալ ներխուժումից հետո, երբ նրան քննադատել էին հայրենիքում Ռուսաստանին աջակցելու համար։
AFP-ն հիշեցնում է, որ Շրյոդերը հրապարակավ չի դատապարտել Ռուսաստանի պատերազմն Ուկրաինայի դեմ։
Թարգմանությունը՝ Էմմա Չոբանյանի