Քաղաքականություն
29.04.2026 | 17:44
Գերմանիայի գլխավոր դատախազության տվյալներով՝ Բեռլինում քրեական ոստիկանության աշխատակիցները ձերբակալել են Ղազախստանի քաղաքացու՝ Ռուսաստանի օգտին լրտեսություն անելու կասկածանքով, գրում է Current time-ը։
Նրա լրիվ անունը չի հրապարակվում։ Փաստաթղթերում նա նշված է որպես Սերգեյ Կ.։ Դատարանը նրա նախնական կալանքի հարցը կորոշի ապրիլի 29-ին։
Քննության տվյալներով՝ ձերբակալվածը կապի մեջ է եղել ռուսական հետախուզական ծառայությունների հետ առնվազն 2025 թվականի մայիսից՝ նրանց փոխանցելով տեղեկություններ։ Այս տեղեկատվությունը ներառում էր տվյալներ, որոնք վերաբերում էին Գերմանիայի կողմից Ուկրաինային տրամադրվող ռազմական օգնությանը և գերմանական պաշտպանական արդյունաբերության վիճակին։ Ենթադրաբար, հատուկ հետաքրքրություն էին ներկայացնում անօդաչու թռչող սարքերի և ռոբոտատեխնիկայի արտադրողները։
Հետաքննողները նաև կարծում են, որ կասկածյալը լուսանկարել է ռազմական ավտոշարասյուները մայրուղիներում, այդ թվում՝ ՆԱՏՕ-ի ավտոշարասյուները, ինչպես նաև Բեռլինի կառավարական շենքերը: Ավելին, ըստ մեղադրողների, նա «տեղեկացրել է իր հետախուզական կոնտակտին Գերմանիայում դիվերսիայի համար հարմար թիրախների մասին և առաջարկել է լրացուցիչ մարդկանց հավաքագրել դիվերսիոն և լրտեսական խմբի համար»:
Խուզարկություն է իրականացվել կասկածյալի բնակարանում, ինչպես նաև մեկ այլ անձի տարածքում, որը գործով կասկածյալ չի համարվում: Իշխանությունները չեն հրապարակել խուզարկությունների արդյունքները:
Անվտանգության ուժերի աղբյուրների համաձայն՝ կան նշաններ, որ Սերգեյ Կ.-ն նախկինում մասնակցել է Ուկրաինայի Դոնեցկի մարզում ռուսական կողմից ռազմական գործողություններին։
Թարգմանությունը՝ Էմմա Չոբանյանի