ԱՄՆ նախագահ Դոնալդ Թրամփը և նրա վարչակազմի անդամները տարհանվել են Սպիտակ տան թղթակիցների ասոցիացիայի տարեկան ընթրիքից, որը շաբաթ օրը՝ ապրիլի 25-ին, անցկացվում էր Washington Hilton հյուրանոցում, «անվտանգության սպառնալիքի» պատճառով, հայտնում են տեղական լրատվամիջոցները։ ԶԼՄ-ների տվյալներով՝ խոսքը վերաբերում է մի տղամարդու, ով հյուրանոցում կրակ է բացել։
ԱՄՆ գաղտնի ծառայությունն ու այլ անվտանգության մարմինները շրջապատել են հյուրանոցի հանդիսությունների սրահը, որտեղ ավելի քան հարյուր մարդ սպասում էր Թրամփի ելույթին, գրում է Associated Press գործակալությունը։ Մասնակիցներից ոմանք հայտնել են, որ, իրենց կարծիքով, լսել են հինգից ութ կրակոց։ Կրակողը չի ներխուժել սրահ․ միջադեպը տեղի է ունեցել հյուրանոցի այլ հատվածներից մեկում։
Միջոցառմանը ներկա էին նաև առաջին տիկին Մելանյա Թրամփը, ԱՄՆ փոխնախագահ Ջեյ Դի Վենսը, պաշտպանության նախարար Փիթ Հեգսեթը և պետքարտուղար Մարկո Ռուբիոն։ Նրանք, ինչպես նաև միջոցառմանը հրավիրված լրագրողները, տարհանվել են, իսկ հյուրանոցում անվտանգության միջոցները խստացվել են։
Ավելի ուշ Սպիտակ տան մամուլի ծառայությունը հայտնել է, որ Գաղտնի ծառայությունը ձերբակալել է ենթադրյալ կրակողին։ Տղամարդու ձերբակալությունը հաստատել է նաև ԱՄՆ նախագահը Truth Social սոցիալական ցանցում կատարած գրառմամբ։
Լրատվամիջոցների հաղորդմամբ՝ կասկածյալը Հարավային Կալիֆոռնիայի 31-ամյա բնակիչ է, մասնավոր ուսումնական հաստատություններից մեկի դասախոս։ Նա եղել է այն հյուրանոցի հյուրերից, որտեղ տեղի էր ունենում Թրամփի հանդիպումը լրագրողների հետ, սակայն այդ միջոցառման հրավեր չի ունեցել։ Ենթադրվում է, որ նա գործել է միայնակ։
«Լարված երեկո Վաշինգտոնում։ Գաղտնի ծառայությունն ու իրավապահները հիանալի աշխատանք են կատարել։ Նրանք գործել են արագ և խիզախ։ Կրակողը ձերբակալված է, և ես խորհուրդ եմ տվել «շարունակել շոուն», սակայն լիովին կհետևեմ իրավապահ մարմինների առաջարկություններին»,– գրել է ԱՄՆ նախագահը։
Քիչ անց տեղի ունեցած մամուլի ասուլիսի ընթացքում Թրամփը նշել է, որ հարձակվողը, որը նպատակադրված էր սպանել մարդկանց, ունեցել է մի քանի զենք և կրակել է Գաղտնի ծառայության աշխատակցի վրա, ում փրկել է զրահաբաճկոնը։
Թրամփի խոսքով՝ միջադեպի պատճառով որոշվել է հետաձգել լրագրողների հետ հանդիպումը։
Տեսանյութերը՝ այստեղ։