Մինչ դատարանն այսօր կհրապարակեր Բագրատ սրբազանի կալանքը երկարաձգելու վերաբերյալ որոշումը, նրա խափանման միջոցը վերացնելու միջնորդություններով ու հայտարարություններով հանդես եկան գործով փաստաբանները եւ մեղադրյալները:
ԱԺ «Հայաստան» խմբակցության պատգամավոր Արթուր Սարգսյանը խնդրեց Բագրատ սրբազանին ազատ արձակելու որոշմամբ դատարանին ապացուցել, որ որոշումները դատարանում են կայացվում, ոչ թե կառավարության շենքում:
«Համախմբելով ժողովրդին ու ընդդիմությանը՝ Բագրատ սրբազանը ոչ թե ահաբեկչություն պետք է աներ, այլ այս չարիքի իշխանությանը պետք է հեռացներ: Դրա համար այս շինծու գործը կարեցին ու Բագրատ սրբազանը գտնվում է կալանքի մեջ: Համոզված եմ՝ դուք ուզում եք, որ մեկ րոպե շուտ Բագրատ սրբազանն էլ, բոլորս էլ լինենք ազատության մեջ: Բայց վստահաբար ասում եմ՝ այս դահլիճում որոշումները կայացվում են ոչ թե օրենքով, այլ կայացվում են կառավարության շենքում: Հիմա, եթե որոշումները չեն կայացվում կառավարության շենքում, դուք հնարավորություն ունեք Բագրատ սրբազանին ազատ արձակելով՝ ասեք Արթուր Սարգսյանի համոզմունքը սխալ էր, որովհետեւ ես համոզված եմ, որ մինչեւ հունիսի 7-ը մնալու է կալանքի մեջ»,- ասաց պատգամավորը:
«Ողջ հանրությունը տեղյակ է՝ քաղաքական գործ է, նպատակ է ունեցել մի քանի խնդիր լուծել: Ես իրատեսական չեմ համարում, որ նախքան ընտրությունները բան կփոխվի խափանման միջոցի հետ կապված, բայց ինչեւէ՝ կարող է հրաշք լինի: Բագրատ սրբազանը հեղինակություն է վայելում, որովհետեւ առաջին իսկ օրվանից կանգնած է եղել հայրենիքի ու ժողովրդի կողքին, իր եկեղեցու կողքին: Այն հանգամանքը, որ հեղինակություն է վայելում, դարձել է մտահոգիչ, բայց մեզ համար մտահոգիչ չէ, հպարտանալու հանգամանք է: Այս օրերին Բագրատ սրբազանը վտանգ է ներկայացնում իր խոսքով, իր կարծիքով ու իր հայրենասիրությամբ»,- հավելեց փաստաբան Սերգեյ Հարությունյանը՝ ընդգծելով, որ դատարանը կարող է այսօր Բագրատ սրբազանի կալանքը չերկարաձգելու որոշմամբ փոխել դատարանի ու արդարադատության մասին հանրության վատ ընկալումները:
Արփինե ՍԻՄՈՆՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: