ԵՄ էներգետիկ ցանցը լիովին հարմարեցված չէ վերականգնվող աղբյուրներից ստացվող էլեկտրաէներգիան ընդունելուն և կարիք ունի արդիականացման: Այս մասին հայտարարել է ԵՀ-ի պաշտոնական ներկայացուցիչը:
«Եվրահանձնաժողովը ինտենսիվ աշխատում է Եվրոպայի էներգետիկ ցանցի վրա։ Սա աշխարհում ամենաշատ փոխկապակցված ցանցն է, սակայն, ցավոք, այն ստեղծվել է տարիներ առաջ և ամբողջությամբ չի կարող ընդունել վերականգնվող աղբյուրներից ստացվող էներգիան։ Ապագայում այն պետք է կատարելագործվի», – ասել է բանախոսը:
Նրա խոսքով՝ հենց այդ պատճառով Եվրահանձնաժողովը կազմակերպում է բարձր մակարդակի խորհրդակցություններ էներգետիկ ոլորտում, որպեսզի հասկանա, թե որոնք են խոչընդոտներն ու մարտահրավերները և ինչպես կարելի է լուծել այդ խնդիրները։
«Մենք, իհարկե, ցանկանում ենք առաջիկա տարիներին ավելացնել վերականգնվող էներգիայի արտադրությունը և այդ պատճառով ուսումնասիրում ենք ֆինանսավորման ու ներդրումների տարբեր հնարավորություններ՝ մեր էներգետիկ ենթակառուցվածքը բարելավելու համար»:
Նա նշել է, որ էներգետիկ համակարգում վերականգնվող աղբյուրների բաժնի ավելացման մասին խոսելիս պետք է մտածել նաև այն մասին, թե ինչպես ապահովել, որ ցանցը կարողանա ընդունել «արտադրվող և աճող ծավալները»։
ԵՀ ներկայացուցիչը հայտնել է, որ հանձնաժողովը պատրաստելու է էներգետիկ ենթակառուցվածքի արդիականացման վերաբերյալ առաջարկությունների փաթեթ։ Միաժամանակ արդեն առաջարկվել է էլեկտրական ցանցի զարգացման գործողությունների ծրագիր, ինչպես նաև քննարկվում են ներդրումների և Բրյուսելի կողմից հնարավոր աջակցության տարբերակներ։