Մամուլում տեղեկություններ էին տարածվել, թե օրեր առաջ միջադեպ է տեղի ունեցել «Մարտինի Ռոյալ» սրճարանում, որը, ըստ հրապարակումների, ուղեկցվել է ծեծկռտուքով և կրակոցներով։ Նշվում էր նաև, որ միջադեպը կապ ունի գործարարներ Սամվել Ալեքսանյանի և «Զովք» ընկերության սեփականատիրոջ միջև առկա խնդիրների հետ։
Տեղեկությունների ճշտման նպատակով Մեգանյուզը դիմել է Ներքին գործերի նախարարությանը։
Ի պատասխան մեր հարցման՝ ՆԳՆ-ն Մեգանյուզին փոխանցել է հետևյալ պարզաբանումը․
«Նշված դեպքի վերաբերյալ հայտնում ենք, որ խուլիգանության փաստով կազմված փաստաթղթերը փոխանցվել են նախաքննական մարմին, իսկ կրակոցների վերաբերյալ հրապարակված տեղեկությունը չի համապատասխանում իրականությանը»։
Այսպիսով, նախարարությունը հաստատում է միջադեպի առկայությունը՝ խուլիգանության փաստով, սակայն հերքում է կրակոցների մասին լուրերը։
Թե ինչ բնույթի տարաձայնություն է եղել և արդյոք այն առնչություն ունի գործարար շրջանակների միջև հարաբերություններին, իրավապահ մարմինների կողմից առայժմ հավելյալ մանրամասներ չեն հրապարակվել։
Քրեական վարույթի շրջանակում իրականացվում են անհրաժեշտ քննչական գործողություններ։
Meganews.am