ՀՀ քաղաքացին դիմել է Մարդու իրավունքների պաշտպանին՝ տեղեկացնելով, որ իր ընտանիքը 1994 թվականից հաշվառված է ընտանիքների անապահովության գնահատման համակարգում (անապահովության միավորը կազմում է 31.44, և իր խնամքին գտնվում են երեք անչափահաս երեխաներ ու կենսաթոշակառու ծնողները), սակայն հարազատները չեն տեղեկացվել պետության կողմից երաշխավորված անվճար և արտոնյալ բժշկական օգնության հնարավորությունների մասին և վճարել են բժշկական ծառայությունների համար: Այդ մասին հայտնում են ՄԻՊ գրասենյակից:
Պաշտպանի միջամտությամբ և իրավասու մարմնի հետ համագործակցությամբ բարձրացված հարցը լուծվել է, բժշկական օգնության համար նախապես վճարված գումարը ամբողջությամբ վերադարձվել է քաղաքացուն:
Քաղաքացին Մարդու իրավունքների պաշտպանին հայտնել է, որ մարզից տեղափոխվել է մայրաքաղաքի համապատասխան բժշկական կենտրոն, որտեղ ախտորոշվել է գլխուղեղի արյան շրջանառության սուր խանգարում՝ հեմոռագիկ տիպի։
Ըստ նրա՝ հարազատները բժշկական կենտրոնում կատարել են անհրաժեշտ վճարումը, որից հետո ինքը վիրահատվել է։ Մինչ մայրաքաղաքի համապատասխան բժշկական կենտրոն տեղափոխվելը՝ առաջնային բուժօգնությունը ստացել է իր մարզի բժշկական կենտրոնում: Քաղաքացու պնդմամբ՝ բժշկական կենտրոններից որևէ մեկում ինքը և իր հարազատները չեն ստացել բանավոր կամ գրավոր տեղեկատվություն պետության երաշխավորած անվճար և արտոնյալ պայմաններով բժշկական օգնությունից և սպասարկումից օգտվելու հնարավորությունների, ծավալների, իրավունքների և դրանց իրականացման մեխանիզմների մասին, իսկ հարազատները, գտնվելով հուզական ծանր վիճակում, չեն տեղեկացրել իր՝ ընտանիքների անապահովության գնահատման համակարգում հաշվառված լինելու մասին:
Դիմումում նշված հարցի կապակցությամբ պարզաբանումներ ստանալու նպատակով Պաշտպանի աշխատակազմը դիմել է ՀՀ առողջապահության նախարարություն: Ի պատասխան՝ Պաշտպանի աշխատակազմին տեղեկություն է ներկայացվել այն մասին, որ բարձրացված հարցն ուսումնասիրվել է Առողջապահության նախարարությունում, և վերջինիս համապատասխան ընթացք է տրվել։
Արդյունքում՝ Պաշտպանի միջամտությամբ և իրավասու մարմնի հետ համագործակցությամբ քաղաքացու բարձրացրած հարցն ստացել է լուծում, և բժշկական օգնության ու սպասարկման համար նախապես վճարված գումարը վերադարձվել է:
Նշված տեղեկատվությունը Պաշտպանի ներկայացուցիչը փոխանցել է քաղաքացուն՝ ուղղորդելով համապատասխան բժշկական կենտրոն՝ դիմում լրացնելու և անհրաժեշտ փաստաթղթեր ներկայացնելու նպատակով։
Բողոքի քննարկման ընթացքում քաղաքացին Պաշտպանին հասցեագրած լրացուցիչ դիմումով տեղեկացրել է, որ իր բարձրացրած հարցը Պաշտպանի աջակցությամբ ստացել է լուծում, և բժշկական օգնության ու սպասարկման համար նախապես վճարված գումարը վերադարձվել է: