Նոր անձնագրի շնորհանդեսի համար ծախսվել է 176 մլն դրամ. «Հրապարակ»

Բաժանորդագրվել

Ի դեպ, ըստ պարբերականի, ծառայություններ մատուցող ընկերության հետ պայմանագիր է կնքվել առանց մրցույթի:

ԵՐԵՎԱՆ, 20 նոյեմբերի – Sputnik. Ներքին գործերի նախարարությունը կենսաչափական նոր անձնագրի շնորհանդեսի համար ավելի քան 176 մլն դրամ է ծախսել: Այս մասին գրում է «Հրապարակ» օրաթերթը՝ նշելով, որ այս մասին տեղեկացել են «Մեկ անձից գնումների» հարթակից:

«ՆԳՆ-ն առանց մրցույթի պայմանագիր է կնքել «Կոմբինատ փրոդաքշն» ՍՊԸ-ի հետ և 176 մլն 32 հազար 56 դրամ գումար վճարել։ ՍՊԸ-ի տնօրեն Լիլիթ Մարտիրոսյանը մեզ ասաց, որ ծառայության մատուցումը կապված է «Հայփաս» հարթակի` նոր անձնագրերի տպագրության հետ։ Այդ գումարով հոկտեմբերի 31-ին կառավարական շենքի ներքին բակում տեղի է ունեցել կենսաչափական անձնագրին նվիրված միջոցառում` համերգ, որի մեջ ներառվել են լուսային, ձայնային տեխնիկա, բեմի պատրաստում, ֆոտոզոնա, գորգեր, թարգմանչական սարքեր, մոնտաժ, ինչպես նաև հրավիրատոմս և անձնագրային թեմատիկ դեկորի պատրաստում։ Անձնագրի դեկորները 20 հատ են եղել, յուրաքանչյուրի արժեքը՝ 800 հազար դրամ։ Խոսքը Հանրապետության հրապարակում տեղադրված անձնագրերի մակետների մասին է»,- գրում է թերթը:

Ըստ պարբերականի՝ միայն դեկորների համար վճարվել է 16 մլն դրամ։ 11 մլն դրամ էլ հատկացվել է որպես կազմակերպչական հոնորար։

Պարբերականը նաև հայտնում է, որ «Կոմբինատ փրոդաքշն» ՍՊԸ-ն գրանցվել է 2013-ին, սակայն մինչև 2025-ը պետական գնումներին չի մասնակցել։ 2024-ի օգոստոսին Երևանի քաղաքապետարանն առանց մրցույթի 180 հազար դոլար դրամաշնորհ է տրամադրել ընկերությանը՝ տնօրեն Լիլիթ Մարտիրոսյանի գրության հիման վրա։

Նշենք, որ 2026 թվականի նոյեմբերի 1-ից ՀՀ–ում գործարկվել է նոր կենսաչափական անձնագրերի և նույնականացման քարտերի տրամադրման համակարգը։ Արդեն իսկ դադարեցվել է հին նմուշի անձնագրերի տրամադրումը, սակայն քաղաքացիների մոտ եղածները` մինչ ժամկետի լրանալը, դեռևս գործում են։

Leave a comment