Փաշինյան․ Չի բացառվում՝ դեկտեմբերի 3-ին Պուտինի հետ քննարկենք նաև ՀԿԵ հարցը (PAN.am)

ՀՀ վարչապետ Նիկոլ Փաշինյանը ճեպազրույցում չի բացառել, որ դեկտեմբերի 3–ին Մոսկվայում ՌԴ նախագահ Վլադիմիր Պուտինի հետ հանդիպմանը քննարկվի նաև «Հարավկովկասյան երկաթուղու» կոնցեսիոն պայմանագրի հարցը, հայտնում է Sputnik Արմենիան:

«Հարցը, որը պետք է պատասխան ստանա, հետևյալն է Հայաստանի երկաթուղին արդականացման համար մեծ ներդրումների կարիք ունի։ «Ռուսական երկաթուղիների» հարգելի տնօրենը, երբ եկել էր, ես ասել եմ, որ մեզ կոնկրետ հարցերի պատասխաններ են պետք։ Իմիջիայլոց, աշխատանքային խումբը ստեղծվել է հենց այդ հարցերի պատասխանները տալու համար։ Իսկ իրականում հարցը մեկն է արդյոք «Ռուսական երկաթուղիները» պատրաստվում են ներդրումներ անել անհրաժեշտ ծավալի, որպեսզի Հայաստանի երկաթուղին անհրաժեշտ մրցունակության մակարդակի բերվի»,– հայտարարել է Փաշինյանը:

Նա հավելել է, որ ռուսական կողմի պատրաստակամության դեպքում խնդիր չի առաջանա, հակառակ պարագայում հայկական կողմը ստիպված կլինի այլ ներդրողներ փնտրել։

Անդրադառնալով Դուբլինում արված իր այն հայտարարությանը, որ դեկտեմբերին 3 անգամ այցելելու է Ռուսաստան բանակցություններ վարելու նպատակով՝ վարչապետն ասել է, որ դեկտեմբերի 3-ին նախատեսում է աշխատանքային այցով մեկնել Մոսկվա և հանդիպել ՌԴ նախագահ Վլադիմիր Պուտինի հետ, հայտնում է «Ազատությունը»:

Փաշինյանը մանրամասնել է, որ դեկտեմբերի 11-12-ին նախատեսված է ԵԱՏՄ միջկառավարական խորհրդի՝ վարչապետերի ձևաչափով հանդիպումը, իսկ տարեվերջին Սանկտ Պետերբուրգում կանցկացվեն ԵԱՏՄ և ԱՊՀ ձևաչափերով առաջնորդների ամենամյա հանդիպումները։

Նա հիշեցրել է, որ Պուտինի հետ հանդիպելու պայմանավորվածությունը ձեռք էր բերվել սեպտեմբերին Բիշքեկում:

Ավելի վաղ Ռուսաստանի նախագահի խոսնակ Դմիտրի Պեսկովը հայտարարել էր, որ Մոսկվայում կայանալիք բարձր մակարդակի ռուս-հայկական բանակցությունների հիմնական թեմաներն են լինելու Հայաստանի ապագա կողմնորոշումը և այս հարցի շուրջ հանրաքվեի անցկացումը:

Հայաստանի երկաթուղային ենթակառուցվածքները «Հարավկովկասյան երկաթուղու» կոնցեսիոն կառավարմանն են փոխանցվել 2008 թվականի փետրվարին՝ 30 տարի ժամկետով և պայմանագիրը ևս 10 տարով երկարաձգելու հնարավորությամբ։

Leave a comment