«Առողջության իրավունք» ՀԿ-ի նախագահ Անուշ Պողոսյանի ֆեյսբուքյան գրառումը
ՍԱ ԱՐԴԵՆ ՆՈՆՍԵՆՍ Է
Այսօր Ազգային ժողովում Անահիտ Ավանեսյանը մեղադրում էր նախագահ Սերժ Սարգսյանին ԵԱՏՄ-ին անդամակցելու հարցում։
Բայց մի պահ հետ նայենք փաստերին։
Սերժ Սարգսյանի կառավարման տարիներին Հայաստանում գրանցված էր շուրջ 6000 անուն դեղ, իսկ 2018 թվականից հետո այդ թիվը նվազեց՝ հասնելով շուրջ 3200-ի։
Մինչդեռ ԵԱՏՄ դեղերի միասնական գրանցամատյանում գրանցված է 18 442 անուն դեղ, որոնք պետք է հնարավորություն ունենային անխոչընդոտ ներմուծվել Հայաստան։
Ինչո՞ւ ներկայիս կառավարությունը չի ապահովում այդ հնարավորությունը։ Կարծում եմ՝ պատասխանը բոլորիս հայտնի է։
Հայաստանը պետք է ունենար նաև ռեֆերենսային գնագոյացման համակարգ, բայց չունի։ Ինչո՞ւ՝ նույնպես բոլորիս հայտնի է։
Որովհետև այս ամենի իրականացումը կնշանակեր իրական մրցակցություն, դեղերի գների նվազում և դեղերի ներկրողների ու ներկայացուցիչների գերշահույթների վերացում կամ էական սահմանափակում։
Բայց մի՞թե կառավարությունն իր թշնամին է։ Մի՞թե պետք է իրականացնի այնպիսի բարեփոխումներ, որոնք կվերացնեն իրեն ձեռնտու շահերը, եթե անգամ դրա արդյունքում կշահի ժողովուրդը։
Հենց սա է խնդիրը։
Ժողովրդի շահը և որոշ տնտեսական խմբերի շահերը միշտ չէ, որ համընկնում են։ Եվ քանի դեռ այս հակասությունը չի լուծվել հօգուտ քաղաքացու, դեղերի մատչելիության մասին հայտարարությունները կմնան ընդամենը հայտարարություններ։
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: