Բյուրականում շուրջ 52 հազար խմ տուֆի ապօրինի արդյունահանում է բացահայտվել․ շրջակա միջավայրին պատճառված վնասը՝ 3,5 մլն դրամ

Հասարակություն

18.11.2026 | 16:46

Արագածոտնի մարզի Բյուրական բնակավայրում գործող հանքավայրում Բնապահպանության և ընդերքի տեսչական մարմինը հայտնաբերել է տուֆի ապօրինի արդյունահանման դեպք։ Ստուգմամբ պարզվել է, որ ընկերությունը հանքավայրի թույլատրված տարածքից դուրս ապօրինի տեղահանել է 51 952 խմ տուֆի լեռնային զանգված, իսկ թաքցված պաշարների ծավալը կազմել է 5912 խմ։ Շրջակա միջավայրին պատճառված վնասը գնահատվել է շուրջ 3,5 մլն դրամ։ Նախատեսվում է կիրառել վարչական պատասխանատվության միջոցներ, իսկ պետությանը պատճառված ընդհանուր վնասի չափը դեռ գնահատվում է։

Բնապահպանության և ընդերքի տեսչական մարմնի հաղորդագրությունը՝ ստորև․

Բնապահպանության և ընդերքի տեսչական մարմնի աշխատակիցները ՀՀ ազգային անվտանգության ծառայության, Քննչական կոմիտեի և Պետական եկամուտների կոմիտեի գրությունների հիման վրա ստուգում են իրականացրել Արագածոտնի մարզի Բյուրական բնակավայրում գործող հանքավայրում։

Ստուգման արդյունքում պարզվել է, որ Ընկերությունը հանքավայրի հարավային տեղամասի տարածքից դուրս ապօրինի տեղահանել է 51952խմ տուֆի լեռնային զանգված, իսկ թաքցված ծավալը կազմել է 5912խմ տուֆի մարված պաշար:

Ընկերության տնտեսական գործունեության հետևանքով առաջացած շրջակա միջավայրի վրա ազդեցության գնահատման վնասի չափը կազմել է 3.494.760 դրամ:

Կկիրառվեն վարչական պատասխանատվության միջոցներ։

Պետությանը պատճառված վնասի ընդհանուր չափը գնահատելու համար գրություն է ուղարկվել ՀՀ պետական եկամուտների կոմիտե։

Leave a comment