«Անթաքույց բռնությունն ու վիրավորանքը չեն կարող արդարացվել»․ ՀՌՀ-ն քննադատել է Հանրայինի «Մեծ բանավեճ» հաղորդման հեռարձակումը

Հեռուստատեսության և ռադիոյի հանձնաժողովը մտահոգություն է հայտնել նոյեմբերի 15-ին Հանրային հեռուստաընկերության «Մեծ բանավեճ» հաղորդման հեռարձակման կապակցությամբ։ ՀՌՀ-ի փոխանցմամբ՝ հաղորդման ընթացքում հնչել են սեռական բնույթի արտահայտություններ, ցուցադրվել է ֆիզիկական բռնություն, և այդ ամենը հեռարձակվել է առանց խմբագրման։ Հանձնաժողովն ընդգծել է, որ հաղորդումը նախապես նկարահանված էր, ուստի հեռուստաընկերությունն ուներ բռնության տեսարանները եթերից բացառելու հնարավորություն։

ՀՌՀ-ի հայտարարությունը՝ ստորև․

«Հանրային հեռուստաընկերության «Մեծ բանավեճ» հաղորդման հեռարձակումը նոյեմբերի 15-ին ընդհատվել է սեռական բնույթի արտահայտությունների ու ֆիզիկական բռնության ցուցադրությամբ։ Եվ այս ողջ ընթացքը եթեր է հեռարձակվել առանց խմբագրումների։

Հեռուստատեսության և ռադիոյի հանձնաժողովը հայտնում է իր մտահոգությունն ու տարակուսանքը Հանրային հեռարձակողի նման եթերային քաղաքականության կապակցությամբ։ Անթաքույց բռնությունն ու վիրավորանքը չեն կարող արդարացվել բանավեճին հրավիրված անձերով, թեժ քննարկմամբ, դիտելիություն ապահովելու սին մղումով կամ նույնիսկ ձևական անաչառությամբ։

Հանրային գործառույթ ունեցող ու հեռարձակող մեդիայի ոլորտում օրինակելի դեր կատարող հեռուստաընկերությունը նման իրավիճակներում պարտավոր է հարգել օրենքի պահանջները, չբորբոքել լսարանի հույզերը և զերծ մնալ բռնության օրինականացումից եթերում։ Իրավական հարցերից զատ գոյություն ունեն նաև զուտ էթիկական և մասնագիտական մոտեցումներ, որոնք հեռարձակող ընկերությունների համար առաջնային են՝ անգամ այն դեպքում, երբ լուսաբանվում են բռնության տեսարաններ պարունակող բարձր ամբիոնների անցուդարձը։

Ի վերջո, գոյություն ունեն բանավեճի մասնակիցների սադրանքներին դիմակայելու, լարվածությունը մեղմելու, բռնությունը կանխելու, թեման կառուցողական հուն տեղափոխելու մասնագիտական հնարքներ, հատկապես, երբ խոսքը ոչ թե ուղիղ եթերի, այլ նախապես նկարահանված հաղորդման մասին է։

ՀՌՀ-ն իր կարգավորման դաշտում գտնվող հեռարձակողների հանդեպ միշտ ցուցաբերել է խիստ մոտեցում հատկապես բռնության, ատելության խոսքի ու վիրավորանքների տարածման հարցում՝ գիտակցելով, թե որքան մեծ է տեսալսողական մեդիայի դերը հանրային փխրուն համերաշխությունը պահպանելու, սթափ ու գիտակված դատողություններ անելու շեշտադրմամբ բովանդակություն կառուցելու ուժը»։

Հիշեցնենք՝ նոյեմբերի 13-ին Հանրային հեռուստաընկերության «Մեծ բանավեճ» հաղորդման նկարահանման ընթացքում ծեծկռտուք էր տեղի ունեցել լրագրող, Politik.am կայքի խմբագիր Բորիս Մուրազիի և քաղաքագետ Հարություն Մկրտչյանի միջև։ «Համախմբված ընդդիմության օրակարգը» թեմայով քննարկման ընթացքում կողմերը փոխադարձ վիրավորանքներ ու սպառնալիքներ էին հնչեցրել, որից հետո վեճը վերածվել էր ֆիզիկական բախման։ Հաղորդավարները ստիպված էին եղել միջամտել, իսկ նոյեմբերի 15-ին հաղորդումը հեռարձակվել էր՝ ներառելով միջադեպի կադրերը։

Leave a comment