Մեծ Բրիտանիայի տնտեսությունն աճել է սպասվածից արագ՝ մեծացնելով Անգլիայի բանկի կողմից հիմնական տոկոսադրույքի հերթական բարձրացման հավանականությունը։ Սակայն տնտեսագետները զգուշացնում են, որ արհեստական բանականության ոլորտի զարգացմամբ պայմանավորված տնտեսական ակտիվությունը և սպառողական պահանջարկի կայունությունը կարող են թուլանալ էներգակիրների թանկացման հետևանքով։
Երկրի համախառն ներքին արդյունքը (ՀՆԱ) ամսական կտրվածքով աճել է 0.2%-ով՝ կանխատեսված զրոյական աճի փոխարեն։ Շինարարության ոլորտում արտադրանքի ծավալն ավելացել է 0.8%-ով՝ չորս ամիս շարունակվող անկումից հետո, իսկ ծառայությունների և արդյունաբերության ոլորտներում գրանցվել է 0.2% աճ։
Եռամսյակային կտրվածքով ՀՆԱ-ն աճել է 0.7%-ով՝ համապատասխանելով Անգլիայի բանկի կանխատեսումներին։
Capital Economics-ի տնտեսագետ Ռութ Գրեգորիի գնահատմամբ՝ դրական տնտեսական ցուցանիշները մեծացնում են տոկոսադրույքի հերթական բարձրացման հավանականությունը։
Անգլիայի բանկն արդեն բարձրացրել է հիմնական տոկոսադրույքը՝ ավելի քան երեք տարվա ընթացքում առաջին անգամ։ Financial Markets Online-ի տնօրեն Սեմյուել Ֆուլերի խոսքով՝ տնտեսական աճի տվյալները կարգավորող մարմնին հնարավորություն են տալիս ավելի մեծ ուշադրություն դարձնել գնաճի զսպմանը։
Անգլիայի բանկի կանխատեսմամբ՝ գնաճը կարող է հասնել 4.9%-ի։
ING-ի տնտեսագետ Ջեյմս Սմիթը նույնպես ակնկալում է տոկոսադրույքների լրացուցիչ բարձրացում։ Նրա գնահատմամբ՝ գնաճային ճնշումների թուլացման դեպքում կենտրոնական բանկը հետագայում կարող է վերադառնալ տոկոսադրույքների նվազեցման քաղաքականությանը։
Սպառողական ծախսերն աճել են 0.6%-ով՝ չնայած տնային տնտեսությունների իրական եկամուտների վրա առկա ճնշմանը։
Ռութ Գրեգորիի խոսքով՝ սպառողները շարունակում են մեղմել էներգակիրների թանկացման ազդեցությունը՝ ավելացնելով փոխառությունները և կրճատելով խնայողությունները։
ING-ի գնահատմամբ՝ կոմունալ վճարները կարող են աճել շուրջ 25%-ով, ինչը լրացուցիչ ճնշում կգործադրի տնային տնտեսությունների բյուջեների և սպառողական պահանջարկի վրա։
Համակարգչային ծրագրավորման, տեղեկատվական ծառայությունների և էլեկտրոնիկայի արտադրության ոլորտներն ապահովում են Մեծ Բրիտանիայի տնտեսական արտադրանքի շուրջ 4%-ը, սակայն դրանց բաժին է ընկել եռամսյակային տնտեսական աճի մոտ 21%-ը։
Ընկերությունների ներդրումներն աճել են 0.4%-ով՝ արհեստական բանականության տեխնոլոգիաների նկատմամբ բիզնեսի հետաքրքրության մեծացման պայմաններում։
ING-ի տվյալներով՝ տեղեկատվական տեխնոլոգիաների և մասնագիտական ծառայությունների ոլորտները միասին ապահովում են տնտեսական արտադրանքի 14%-ը, սակայն դրանց բաժին է ընկնում տարեկան տնտեսական աճի կեսը։
Միաժամանակ վերլուծաբանները զգուշացնում են, որ տեխնոլոգիական ոլորտի աճի տեմպերը կարող են անկայուն լինել։ ՏՏ ոլորտում արդեն արձանագրվել է արտադրանքի ծավալների նվազում, իսկ մասնագիտական ծառայությունների աճը դանդաղել է։
Capital Economics-ի վերլուծաբանները կասկածում են տնտեսական վերելքի կայունությանը՝ հաշվի առնելով գնաճի՝ 4%-ը գերազանցելու հավանականությունը։
Ընկերությունը կանխատեսում է ՀՆԱ-ի 0.2% եռամսյակային և 1% տարեկան աճ՝ նշելով, որ կանխատեսումների վերանայման ռիսկերը հիմնականում ուղղված են դեպի ավելի բարձր ցուցանիշներ։
Deutsche Bank-ի՝ Մեծ Բրիտանիայի գծով գլխավոր տնտեսագետ Սանջայ Ռաջայի խոսքով՝ երկրի ՀՆԱ-ն տարվա սկզբից աճել է 1,8%-ով։ Սա համավարակից հետո տնտեսական վերականգնման շրջանից ի վեր առաջին երեք եռամսյակների լավագույն արդյունքն է։
Deutsche Bank-ը կարող է բարձրացնել Մեծ Բրիտանիայի տնտեսական աճի կանխատեսումը։
Չնայած երկիրը G7-ի ամենաարագ աճող տնտեսության դիրքը զիջել է ԱՄՆ-ին, երկու երկրների աճիմի տեմպերի տարբերությունը շարունակում է նվազագույն մնալ։