Հավաքական անվտանգության պայմանագրի կազմակերպությունում (ՀԱՊԿ) խորանում է ճգնաժամը՝ կապված Հայաստանի մասնակցության և ֆինանսական պարտավորությունների չկատարման հետ։ Ռուսաստանի Դաշնության արտաքին գործերի նախարար Սերգեյ Լավրովը ՏԱՍՍ-ին տված մեկնաբանությունում հայտարարել է, որ Հայաստանը շարունակում է չկատարել կազմակերպության կանոնադրությամբ ստանձնած պարտավորությունները, մասնավորապես՝ արդեն ավելի քան երկու տարի չկատարելով բյուջետային մուծումները։
Այս համատեքստում Լավրովը հայտնել է, որ ՀԱՊԿ անդամ երկրների ղեկավարների քննարկմանն է ներկայացվելու հատուկ որոշման նախագիծ, որը նախատեսում է կազմակերպության մարմիններում Հայաստանին ձայնի իրավունքից զրկելու հարցը։ Ըստ ռուսական կողմի պարզաբանման՝ նման իրավիճակները և դրանց հետևանքները հստակորեն կարգավորված են ՀԱՊԿ կանոնադրությամբ, և դաշինքի անդամները պայմանավորվել են գործի դնել համապատասխան հոդվածների կիրառման մեխանիզմները։
Հիշեցնենք, որ պաշտոնական Երևանը նախորդ շրջանում փաստացի սառեցրել էր իր մասնակցությունը ռազմական այս կառույցի աշխատանքներին և հրաժարվել ֆինանսավորումից՝ որպես հիմնական պատճառ նշելով ՀԱՊԿ-ի կողմից անվտանգային մարտահրավերներին և Հայաստանի ինքնիշխան տարածքին առնչվող խնդիրներին պատշաճ արձագանքի բացակայությունը։