Լճերն ու ջրամբարները կարող են շատ նման թվալ, սակայն իրականում դրանք ունեն բոլորովին տարբեր ծագում։ Ջրամբարը շատ նման է լճին, սակայն ունի արհեստական ծագում։ Այն նախատեսված է ջրի մեծ պաշարներ կուտակելու համար՝ տարբեր նպատակներով, օրինակ՝ հեղեղումները կանխելու, ջրամատակարարում ապահովելու կամ էլեկտրաէներգիա արտադրելու (հիդրոէլեկտրակայանների միջոցով) համար։
Ջրամբարները շատ վտանգավոր վայրեր են լողալու համար, և խորհուրդ չի տրվում մարդկանց լողալ ջրամբարներում։
Ահա թե ինչու.
Ջրի ջերմաստիճանը սովորաբար շատ ցածր է․ Նույնիսկ ամռան շոգ օրերին ջրի խորքային շերտերը կարող են մնալ չափազանց սառը (հաճախ 10°C-ից 15°C-ից ցածր): Նման ջրում լողալը առաջացնում է ակնթարթային սառը ջրային շոկ, որը հանգեցնում է անկառավարելի հևոցի, հիպերվենտիլյացիայի (արագացված շնչառության), խուճապի, ինչպես նաև ձեռքերի ու ոտքերի մկանների վերահսկողության արագ կորստի կամ թմրածության:
Դրանց ափերը սովորաբար շատ զառիթափ են, ինչը չափազանց դժվարեցնում է ջրից դուրս գալը։
Դրանք կարող են շատ խորը լինել, իսկ ջրի տակ կարող են թաքնված լինել մեխանիզմներ, որոնք կարող են վնասվածքներ պատճառել։
Ջրի մակերեսը կարող է հանգիստ թվալ, սակայն խորքում հոսանքը կարող է շատ ուժեղ լինել՝ ջուրը տեղափոխող պոմպերի աշխատանքի պատճառով։
Դրանք հաճախ գտնվում են մեկուսացված վայրերում, ինչը նշանակում է, որ արտակարգ իրավիճակի դեպքում փրկարար ծառայությունները կարող են շատ հեռու լինել։
Ցավոք, ոչ բոլորը գիտեն ջրամբարներում լողալու հետ կապված վտանգների մասին։
Հայաստանում կառուցվել է շուրջ 80 ջրամբար՝ մոտ 1 մլրդ մ³ ընդհանուր ծավալով։
Հայաստանի ամենամեծ ջրամբարը սահմանային Ախուրյանի ջրամբարն է՝ 525մլն մ³ ծավալով, որի ջրերն օգտագործվում են Թուրքիայի հետ համատեղ հավասար մասնաբաժնով։ Ջրամբարներն օգտագործվում են՝ ոռոգման, էներգետիկայի, ձկնաբուծական և չորային միկրոկլիմայական պայմանները մեղմացնելու նպատակով։
Շրջակա միջավայրի նախարարության հիդրոօդերևութաբանության և մոնիթորինգի կենտրոն
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: