«Հաջողելու է ՀՀ ժողովուրդը, ՀՀ անկախության պահպանումը։ Չի հաջողելու օտար երկրների օրակարգի թելադրանքը։ Մենք պետք է «ոչ» ասենք Ալիևյան Սահմանադրությանը և պաշտպանենք ՀՀ անկախությունը»,- այսօր լրագրողների հետ զրույցում ասաց «Ուժեղ Հայաստան» խմբակցության պատգամավոր Անդրանիկ Գևորգյանը։
Նրա խոսքով՝ այն, ինչ տեղի է ունենում իրենց առաջնորդ Սամվել Կարապետյանի և մյուս ընդդիմադիր գործիչների նկատմամբ, միտված է մեկ նպատակի՝ Հայաստանում Ալիևի Սահմանադրությունը հաստատելուն։
Անդրադառնալով իշխանությունների հայտարարություններին, թե Ալիևն ի՞նչ կապ ունի իրավական գործընթացների հետ, և Ալիևի անունը չպետք է տալ՝ Գևորգյանն արձագանքեց.
«Բա ո՞ւմ անունը տանք։ Եթե այս տարիների ընթացքում տեսնում ենք, որ անընդհատ Ալիևը պահանջներ է ներկայացնում, մենք էլ հանգիստ կատարում ենք այդ պահանջները, գնում միակողմանի զիջումների… Մենք միայն ստանում ենք նախապայմաններ, թելադրանք, իսկ մեր իշխանությունը շատ թույլ դիրքերից, գլխիկոր, ուզում է կատարել դրանք՝ առանց ընդդիմանալու»։
Անդրադառնալով իշխանության ներկայացուցիչների տարբեր պնդումներին, թե ընդդիմության խոսույթից եթե հանեն «Ալիև», «Ադրբեջան» բառերը, այլևս խոսելու բան չի մնա, Գևորգյանն ասաց.
«Եթե մեր հայ ժողովրդին սպառնում է Ադրբեջանը, եթե մենք ազգային անվտանգության սպառնալիք ունենք, եթե տարածքային կորուստներ ենք ունեցել, և այս ութ տարիներին մեր իշխանությունները չեն վարել ճիշտ արտաքին քաղաքականություն, բա ո՞ւմ մասին խոսենք։ Այդ հարցը թող իրենք իրենց տան»։
Արփինե ՍԻՄՈՆՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: