Ամերիկյան Waymo ընկերությունը (մտնում է Alphabet Inc.-ի կազմի մեջ) հայտնել է, որ նախատեսում է 2028 թվականին Տորոնտոյում գործարկել անվարորդ տաքսիների ծառայությունը։ Սա Waymo-ի առաջին նախագիծը կլինի Կանադայում և ընկերության գործունեությունը ԱՄՆ-ից դուրս ընդլայնելու հերթական քայլը։
Waymo-ն նախապատրաստական աշխատանքներ է սկսում Կանադայի խոշորագույն քաղաքում։ Դրանք ներառում են քաղաքի քարտեզագրումը և տեղական իշխանությունների հետ համագործակցությունը՝ Waymo Driver ինքնավար կառավարման համակարգի ապագա ներդրմանը նախապատրաստվելու համար։ Արդեն առաջիկա օրերին Տորոնտոյի փողոցներում կհայտնվեն ռոբոտաքսիները, սակայն առայժմ դրանք կշարժվեն վարորդների կառավարմամբ։
«Կանադական շուկա մուտք գործելը կարևոր հանգրվան է Waymo-ի գլոբալ զարգացման ճանապարհին», – նշել է ընկերության գլխավոր գործադիր տնօրեններից մեկը՝ Տեկեդրա Մավականան։
Տորոնտոյում ծառայության աշխատանքն ապահովելու համար Waymo-ն կհամագործակցի Element Fleet Management ընկերության հետ։ Տորոնտոյում գտնվող գլխամասային գրասենյակով այս ընկերությունն աշխարհում առաջատարներից է ավտոպարկերի կառավարման և շարժունակության ոլորտում խելացի լուծումների մշակման ուղղությամբ։ Այն ստանձնելու է Waymo-ի տրանսպորտային միջոցների պարկի համալիր սպասարկումը։
Ավտոաշխարհի նորությունները հրապարակվում են ՌԵԳՈ ԻՆՇՈՒՐԱՆՍ ապահովագրական ընկերության աջակցությամբ, որը ներկայացնում է ԿԱՍԿՈ ապահովագրություն։ Կասկոն կօգնի անսպասելի իրավիճակներում պահպանել կայուն ֆինանսական վիճակ։