ՈՒԵՖԱ-ի Ազգերի լիգայի խմբային փուլի երրորդ տուրում Հայաստանի ազգային հավաքականը Նիկոսիայի GSP մարզադաշտում 0:2 հաշվով արտագնա պարտություն կրեց Կիպրոսի ընտրանուց։
Տանտերերը հանդիպման ելքը վճռեցին առաջին իսկ խաղակեսում. 19-րդ րոպեին հաշիվը բացեց Լեոնիդաս Կոնոմիսը, իսկ 31-րդ րոպեին Անդրոնիկոս Կակուլիսը կրկնապատկեց Կիպրոսի առավելությունը։ Երկրորդ խաղակեսի մեկնարկում՝ 52-րդ րոպեին, դաշտից հեռացվեց Կիպրոսի հավաքականի ֆուտբոլիստ Կոստաս Պիլեասը, սակայն Եղիշե Մելիքյանի գլխավորած թիմին չհաջողվեց օգտվել թվային առավելությունից և բեկել խաղի ընթացքը։
C Լիգայի երկրորդ խմբի մյուս հանդիպմանը Չեռնոգորիայի հավաքականը 2:1 հաշվով արտագնա հաղթանակ տարավ Լատվիայի նկատմամբ։ Երեք տուրերից հետո մրցաշարային աղյուսակը 9 միավորով գլխավորում է Չեռնոգորիան։ Կիպրոսն ունի 4 միավոր, Հայաստանի հավաքականը՝ 3, իսկ Լատվիան եզրափակում է աղյուսակը 1 միավորով։
Հիշեցնենք, որ մեկնարկային երկու տուրերում Հայաստանի ընտրանին 2:0 հաշվով հաղթել էր Լատվիային և 2:3 հաշվով պարտվել Չեռնոգորիային։ Մեր հավաքականն իր հաջորդ հանդիպումը կանցկացնի հոկտեմբերի 5-ին՝ հյուրընկալվելով խմբի առաջատար Չեռնոգորիային։