ԱՄՆ նախագահ Դոնալդ Թրամփն անձամբ կդիմավորի Չինաստանի նախագահ Սի Ծինպինին Վաշինգտոնի մերձակայքում տեղակայված «Էնդրյուս» ռազմակայանում՝ շեղվելով գրեթե վեց տասնամյակ պահպանվող պրոտոկոլից։ Այս մասին հայտնել է «Financial Times»-ը։
Ինչպես նշում է պարբերականը, սա կլինի առաջին դեպքը Ջոն Քենեդիի նախագահության օրերից ի վեր, երբ ԱՄՆ գերագույն գլխավոր հրամանատարն անձամբ է դիմավորում համաշխարհային առաջնորդի այդ ռազմակայանում։ 1962 թվականին Քենեդին օդանավակայանի թռիչքուղու վրա դիմավորել էր Միացյալ Թագավորության վարչապետ Հարոլդ Մակմիլանին։
Նման քայլը կվկայի նախագահ Սիի հանդեպ Թրամփի տածած խորը հարգանքի մասին։
FT-ն ընդգծել է, որ սա առաջին դեպքը չէ, երբ ԱՄՆ նախագահն անձամբ է դիմավորում մեկ այլ համաշխարհային տերության ղեկավարի։ 2025 թվականի օգոստոսին նա անձամբ դիմավորել էր Ռուսաստանի նախագահ Վլադիմիր Պուտինին Անքորիջի օդանավակայանի թռիչքուղու վրա։
Սի Ծինպինի պետական այցն ԱՄՆ տեղի կունենա սեպտեմբերի 23-ից 25-ը։ Սա չինացի առաջնորդի առաջին այցն է Ամերիկա այդ կարգավիճակով վերջին 11 տարվա ընթացքում։