«Անհարիր խնջույքներ Հովհաննավանքում»․ Մայր Աթոռ Սուրբ Էջմիածնի խստաշունչ հայտարարությունը
Մայր Աթոռ Սուրբ Էջմիածնի տեղեկատվական համակարգը հանդես է եկել պաշտոնական հայտարարությամբ՝ խստորեն դատապարտելով Հովհաննավանքում վերջին շրջանում արձանագրվող մտահոգիչ երևույթները։
Մայր Աթոռի տարածած հայտարարության մեջ մասնավորապես նշված է․
«Մայր Աթոռ Սուրբ Էջմիածինը խստորեն դատապարտում է Հովհաննավանքում վերջին շրջանում տեղ գտնող մտահոգիչ երևույթը՝ վանքապատկան տարածքում անհարիր միջոցառումների, այս պարագայում՝ խնջույքի անցկացումը, ինչը խաթարում է վանքի հոգևոր և աղոթական մթնոլորտը, անհանգստություն պատճառում շրջակայքի բնակչությանը։
Այս իրավիճակն անմիջական հետևանքն է կարգալույծ հռչակված Ստեփան Ասատրյանի նկատմամբ իշխանությունների բացահայտ հովանավորության և թողտվության, որով ուղղակի ոտնահարվում են ՀՀ օրենքները և Հայաստանյայց Առաքելական Սուրբ Եկեղեցու իրավունքները։ Հովհաննավանքի բռնազավթված լինելու իրողությունը, տեղ գտնող ինքնիրավչությունը նաև վիրավորում են հավատացելոց բարեպաշտական զգացումները, ոտնահարում իրավունքները՝ անվավեր ծեսերով ու խորհրդակատարություններով մոլորության մեջ գցելով բարեպաշտ այցելուներին։
Անթույլատրելի նկատելով այս երևույթները՝ Մայր Աթոռը վերստին կոչ է ուղղում պատկան պետական մարմիններին՝ զերծ մնալու եկեղեցական կյանքին պառակտիչ միջամտություններից և վերականգնելու զավթյալ բոլոր եկեղեցիների օրինական կարգավիճակը»։
Մայր Աթոռի այս հայտարարությունը հերթական անգամ ընդգծում է Եկեղեցու և պետական մարմինների միջև առկա լարվածությունն ու սրբավայրերի օրինական կարգավիճակի վերականգնման անհրաժեշտությունը։