Լույս սեպտեմբերի 2-ի գիշերը ռուսական զորքերը հրթիռային և անօդաչու թռչող սարքերով հարվածներ են հասցրել Օդեսային և Օդեսայի մարզին, գրում է Meduza-ն։
Օդեսա քաղաքում վնասվել է 24-հարկանի բնակելի շենք, մի քանի հարկերում բնակարաններ են ավերվել, իսկ հարևան շենքերի պատուհանները կոտրվել են։
Հաղորդվում է, որ վիրավորվել է 8 մարդ, այդ թվում՝ 1 երեխա։ Վիրավորներից երկուսը հոսպիտալացվել են։ Վնասվել են ավտոմեքենաներ, ինչպես նաև գրասենյակային շենքեր և երկու ուսումնական հաստատություն։
Նշվում է, որ Օդեսայում մասնակի դադարեցվել է էլեկտրաէներգիայի մատակարարումը, հասարակական տրանսպորտի գործունեությունը դադարեցվել է, իսկ Պերեսիպ շրջանում ջրամատակարարումն ընդհատվել է։
Ռուսաստանի պաշտպանության նախարարությունը հայտարարել է, որ հարվածներն ուղղված են եղել Օդեսայի նավահանգստում անօդաչուներ և վառելիքով ռեզերվուարներ արտադրող ձեռնարկությանը։
Կիևի Գոլոսիևսկի շրջանում ԱԹՍ-ի բեկորների՝ բաց տարածքում ընկնելու հետևանքով հրդեհ է բռնկվել, հայտնել է քաղաքի քաղաքապետ Վիտալի Կլիչկոն։
Ռուսաստանը հարձակվել է Ուկրաինայի վրա՝ արձակելով «Իսկանդեր-Մ» երկու բալիստիկ հրթիռ, Х-59/69 երկու ավիացիոն հրթիռ և 174 անօդաչու թռչող սարք, որոնց մոտ կեսը ռեակտիվ շարժիչով, հայտնել են Ուկրաինայի զինված ուժերի ռազմաօդային ուժերը։
Հայտարարության համաձայն՝ հարվածների հիմնական ուղղությունը կրկին Օդեսայի և Կիևի մարզերն են եղել։ Ռուսաստանը Կիևի մարզն ու Կիևը անընդմեջ հարձակման է ենթարկում արդեն յոթերորդ օրը։
Առավոտյան ամփոփագրում նշվում է, որ խոցվել կամ ճնշվել է օդային 141 թիրախ։ Հրթիռների և հարվածային ԱԹՍ-ների հարվածներ են արձանագրվել 16 վայրերում։
Թարգմանությունը`Էմմա Չոբանյանի