Նախագահ Ռեջեփ Թայիփ Էրդողանը «անակնկալ կադրային փոփոխություններ է իրականացրել կառավարությունում՝ փոխարինելով արդարադատության և ներքին գործերի նախարարներին»։ Այս մասին հայտնում է Associated Press-ը:
Թուրքիայի պաշտոնական տեղեկագիրը (Resmî Gazete) հայտնել է, որ Ստամբուլի գլխավոր դատախազ Աքին Գյուրլեքը նշանակվել է արդարադատության նախարար՝ փոխարինելով Յըլմազ Թունչին, իսկ Արևելյան Էրզրում նահանգի նահանգապետ Մուստաֆա Չիֆթչին նշանակվել է ներքին գործերի նախարար՝ փոխարինելով Ալի Երլիքայային։
Պաշտոնական որևէ պատճառ չի նշվել այս փոփոխությունների համար, սակայն տեղեկագրում ասվել է, թե Թունչը և Երլիքայան «խնդրել են ազատել իրենց զբաղեցրած պաշտոններից»։
«Փոփոխությունները տեղի են ունենում այն ժամանակ, երբ Թուրքիայում քննարկվում են հնարավոր սահմանադրական բարեփոխումներ և առաջ է մղվում խաղաղության նախաձեռնություն Քրդստանի աշխատավորական կուսակցության (PKK) հետ՝ նպատակ ունենալով ավարտել տասնամյակներ շարունակվող հակամարտությունը։ Սպասվում է, որ խորհրդարանը կընդունի գործընթացին աջակցող բարեփոխումներ», – նշում է AP-ն և հավելում, թե Աքին Գյուրլեքի նշանակումը վիճահարույց է համարվում։ Նախկին դատախազը մի շարք բարձրաձայն դատավարություններ է ղեկավարել ընդդեմ գլխավոր ընդդիմադիր ուժի՝ Հանրապետական ժողովրդական կուսակցության (CHP) անդամների։
CHP-ի ղեկավարած համայնքների տասնյակ պաշտոնյաներ ձերբակալվել են կոռուպցիոն հետաքննությունների շրջանակում։ Նրանց թվում է եղել նաև Ստամբուլի քաղաքապետ Էքրեմ Իմամօղլուն, որը լայնորեն դիտարկվում է որպես Էրդողանի հիմնական մրցակից և անցյալ տարի ձերբակալվել է։
Քննադատները կարծում են, որ այս հետապնդումները քաղաքական դրդապատճառներ ունեն, մինչդեռ Թուրքիայի կառավարությունը պնդում է, որ դատական համակարգն անկախ է:
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: