Ֆրանսիան պահանջում է խստացնել Ուկրաինային տրամադրված վարկի վերահսկողությունը

Ֆրանսիան պնդում է, որ Եվրահանձնաժողովը (ԵՀ) խստացնի վերահսկողությունը Կիևի կողմից ԵՄ 90 միլիարդ եվրոյի վարկային միջոցների օգտագործման նկատմամբ: Այս մասին հաղորդում է Euronews-ը՝ ընդգծելով, որ հատկացված գումարները նախատեսված են Ուկրաինայի պաշտպանունակության պահպանման և սպառազինության ձեռքբերման համար։

«65%-ի կանոնը» և ուկրաինական բացառությունները

Կիևի համար հաստատված վարկային համաձայնագրի նախնական պայմանների համաձայն՝ պաշտպանական արտադրանքի համար նախատեսված միջոցների առնվազն 65%-ը պետք է ծախսվի բացառապես եվրոպական մատակարարներից սպառազինություն գնելու վրա։

Այնուամենայնիվ, ուկրաինական կողմն իրավունք ունի շրջանցել այդ կանոնը և դիմել երրորդ երկրների աջակցությանը, եթե ԵՄ-ում արտադրված զենքը․

1. Չափազանց թանկ է,

2. Չի համապատասխանում Ուկրաինայի կարիքներին,

3. Հնարավոր չէ մատակարարել անհրաժեշտ սեղմ ժամկետներում կամ ծավալներով:

Ուկրաինայի իշխանություններն արդեն երկու անգամ օգտվել են այս բացառությունից՝ գնելով չինական արտադրության ԱԹՍ-ների բաղադրիչներ և ամերիկյան Patriot ՀՕՊ համակարգերի հրթիռներ։ Փարիզը պահանջում է, որ ԵՀ-ի կողմից տրվող նմանատիպ բացառությունները կրեն բացառապես ժամանակավոր բնույթ։

Եվրոպական երկրների դիրքորոշումների պառակտումը

Ֆրանսիայի խիստ մոտեցմանը հակառակ՝ եվրոպական մի շարք պետություններ հանդես են գալիս Կիևին ավելի մեծ ազատություն տալու օգտին։ Եվրոպական ինն երկրներ նամակ են հղել ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասին՝ խնդրելով թույլ տալ Ուկրաինային ինքնուրույն տնօրինել վարկային միջոցները սպառազինություն ընտրելիս։

Այս հակասությունը ընդգծում է Եվրոմիության ներսում առկա երկակի մոտեցումը․ մի կողմից՝ սեփական ռազմաարդյունաբերության խթանումը, մյուս կողմից՝ Ուկրաինայի առաջնահերթ ռազմական կարիքների արագ բավարարումը։