Իսլանդիայի և Իսպանիայի որոշ քաղաքներում հյուրանոցների գներն ավելի քան կրկնապատկվել են, քանի որ զբոսաշրջիկները շտապում են այդ երկրներ՝ դիտելու այս դարի առաջին արևի ամբողջական խավարումը, որը հնարավոր կլինի տեսնել մայրցամաքային Եվրոպայից։ Այս մասին հայտնում է Financial Times-ը։
Իսլանդիայի մայրաքաղաք Ռեյկյավիկում խավարման գիշերը հյուրանոցային համարի միջին արժեքը գերազանցել է 1000 դոլարը՝ 2025 թվականի նույն օրվա համեմատ աճելով ավելի քան 140%-ով, գրում է Financial Times-ը՝ վկայակոչելով Lighthouse վերլուծական ընկերության տվյալները։
Այն բանից հետո, երբ Իսպանիայի զբոսաշրջության ոլորտը տուժեց վերջին 30 տարվա ամենաուժեղ անտառային հրդեհների պատճառով, խավարման ամբողջական փուլի գոտում գտնվող հյուրանոցների նկատմամբ պահանջարկը կտրուկ աճել է։ Ըստ FT-ի՝ հյուսիսային իսպանական Լա Կորունյա քաղաքում գները նույնպես ավելի քան կրկնապատկվել են, իսկ Բիլբաոյում և Սանտյագո դե Կոմպոստելայում համարների արժեքը համապատասխանաբար աճել է 59%-ով և 31%-ով։ Մայորկայում, որտեղ խավարումը մայրամուտի ժամանակ տեսանելի կլինի հորիզոնին շատ մոտ, գներն աճել են մեկ հինգերորդով։
Ինչպես գրում է պարբերականը, Icelandair ավիաընկերությունը լրացուցիչ չվերթներ է ավելացրել՝ կտրուկ աճած պահանջարկը, հատկապես ԱՄՆ-ից ժամանող զբոսաշրջիկների պահանջարկը բավարարելու համար։ Գործադիր տնօրեն Բոգի Նիլս Բոգասոնի խոսքով՝ ավիաընկերությունը կաշխատի «առավելագույն հնարավոր ծանրաբեռնվածությամբ»։ Մրցակից Delta-ն նույնպես լրացուցիչ չվերթներ է ավելացրել Նյու Յորքից դեպի Ռեյկյավիկ, նշվում է հոդվածում։
Աճել է նաև կարճաժամկետ բնակարանների վարձակալության պահանջարկը, այդ թվում՝ Airbnb-ի նման հարթակներում։ AirDNA վերլուծական ընկերության տվյալներով՝ խավարման ամբողջական փուլի գոտում գտնվող Իսլանդիայի բնակարանների վարձակալության արժեքը խավարման գիշերը նախորդ տարվա նույն ժամանակահատվածի համեմատ աճել է 53.7%-ով։
Իսպանիայում ազդեցությունն ավելի քիչ է զգացվել, քանի որ այնտեղ բնակարանների առաջարկը զգալիորեն ավելի մեծ է։ Այնուամենայնիվ, FT-ի գնահատմամբ՝ խավարման ամբողջական փուլի գոտում գտնվող անշարժ գույքի օբյեկտների գները միջինում աճել են 15.8%-ով։