Վերլուծաբանները գնահատել են Դոնալդ Թրամփի նախաձեռնած «Ոսկե նավատորմ» ծրագրի արժեքը․ մինչև 2056 թվականը դրա իրականացումը կարժենա շուրջ 275 մլրդ դոլար։ Ծրագրի առաջատար նավի արժեքը կկազմի 23 մլրդ դոլար, ինչը կարող է ռեկորդային ցուցանիշ դառնալ ԱՄՆ ռազմական նավերի պատմության մեջ։ Փորձագետները չեն բացառում նաև ծախսերի գերազանցումը, ինչը կարող է ազդել ռազմածովային ուժերի այլ ծրագրերի ֆինանսավորման վրա։
ԱՄՆ Կոնգրեսի բյուջետային վարչության հաշվետվության համաձայն՝ 15 միջուկային մարտանավերից բաղկացած «Ոսկե նավատորմի» կառուցման ծրագիրը կիրականացվի 2027–2056 թվականներին և ընդհանուր առմամբ կարժենա մոտ 275 մլրդ դոլար։
«Ռազմածովային ուժերի նոր միջուկային մարտանավերի ստեղծման ծրագրի ընդհանուր արժեքը 2027–2056 թվականների ընթացքում կկազմի շուրջ 275 մլրդ դոլար», — նշվում է հաշվետվությունում։
Վերլուծաբանների գնահատմամբ՝ շարքի առաջին նավի կառուցման արժեքը կհասնի մոտ 23 մլրդ դոլարի, իսկ մնացած 14 նավերից յուրաքանչյուրի միջին արժեքը կկազմի շուրջ 18 մլրդ դոլար։ Նախատեսվում է, որ բոլոր նավերը կհանձնվեն շահագործման մինչև 2056 թվականը։
Bloomberg-ը նշում է, որ նման ծախսերի դեպքում այս նավերը կդառնան ԱՄՆ պատմության ամենաթանկ ռազմական նավերը։ Փորձագետները նաև զգուշացնում են, որ բյուջեի հնարավոր գերազանցումը կարող է սահմանափակել նավատորմի այլ ծրագրերի ֆինանսավորումը։
Դոնալդ Թրամփը «նոր Ոսկե նավատորմի» ստեղծման մասին հայտարարել էր 2025 թվականի դեկտեմբերին։ Նրա խոսքով՝ ինքն անձամբ մասնակցել է նոր դասի մարտանավերի նախագծմանը, որոնք ստացել են իր անունը։
Հունիսին Թրամփը հանրապետականներին կոչ էր արել արագացնել 350 մլրդ դոլարի բյուջետային օրինագծի ընդունումը, որը ներառում է լրացուցիչ պաշտպանական ծախսեր։ Նախագահի խոսքով՝ դա թույլ կտա ԱՄՆ ռազմական բյուջեն հասցնել 1.5 տրլն դոլարի, որի մի մասը կուղղվի «Ոսկե նավատորմ» ծրագրի ֆինանսավորմանը։