Հայաստանը կարող է կորցնել պանրի արտահանումից ստացվող եկամուտների ավելի քան 80%-ը, եթե զրկվի ռուսական շուկայից, հայտնում է «ՌԻԱ Նովոստի»-ն՝ վերլուծելով ազգային վիճակագրական ծառայությունների տվյալները։
Ավելի վաղ ՌԴ Գյուղատնտեսական վերահսկողության դաշնային ծառայությունը (Ռոսսելխոզնադզոր) հայտնել էր, որ ժամանակավորապես կսահմանափակի Հայաստանից Ռուսաստան կաթնամթերքի բոլոր տեսակների մատակարարումները։
2025 թվականի արդյունքներով Հայաստանը պանրի համաշխարհային արտահանումից ստացել է 16,4 մլն դոլար եկամուտ, որից 13,5 մլն դոլարը բաժին է ընկել Ռուսաստանի շուկա արտահանմանը։ Այսպիսով, ռուսական շուկան ապահովել է հայկական պանրի արտահանման եկամուտների 83%-ը։
Ռուսաստանը ոչ միայն հայկական պանրի խոշորագույն գնորդն է, այլև միակ երկիրը, որը 2025 թվականի ընթացքում ամեն ամիս Հայաստանից ներմուծել է միլիոնավոր դոլարների պանիր։
2025 թվականին հայկական պանրի մյուս խոշոր գնորդներն են եղել ԱՄՆ-ը, որտեղ արտահանումը կազմել է 1,8 մլն դոլար, և Վրաստանը՝ 670,9 հազար դոլար։