«2026թ. հունվարի 1-ից ապահովագրված քաղաքացիների թիվն ավելացել է 14%-ով, և եթե տարեսկզբին խոսում էինք 1,6 մլն շահառուների սպասարկման մասին, ապա հունիս ամսվա տվյալներով մեր շահառուների թիվն արդեն 1,8 մլն է, որոնցից ապահովագրական փաթեթի ծառայություններից օգտվել է 762 404-ը: Այդ աճի մեջ մեծ տեսակարար կշիռ են կազմում վարձու աշխատողներն ու անհատ ձեռնարկատերերը»,- «Արմենպրեսի» մամուլի սրահում կայացած ասուլիսում նշեց Առողջության համընդհանուր ապահովագրության հիմնադրամի գլխավոր տնօրենի ժամանակավոր պաշտոնակատարի պարտականությունները կատարող Սամվել Խարազյանը։
Նա նշեց, որ 200 հազար և ավելի դրամ աշխատավարձ ստացող շահառուների աճը կազմել է ավելի քան 30%, ինչն իր կարծիքով պայմանավորված է առողջության ապահովագրության համակարգի կարևորությամբ և նոր աշխատատեղերի ստեղծմամբ։
«Սա հստակ ցույց է տալիս, որ համակարգը սպասված է եղել, ապահովագրության փաթեթում ներառված ծառայությունների հասանելիությունն ուղղորդել է մեր քաղաքացիներին, որ դիմեն իրենց գործատուներին, որոնց բարի կամքի արտահայտությամբ իրենց աշխատավարձերի չափերի փոփոխությամբ ներառվեն ապահովագրության համակարգում»,- հավելեց նա:
Սամվել Խարազյանի ձևակերպմամբ՝ յուրաքանչյուր 2-րդ ապահովագրված անձ օգտվել է ապահովագրական փաթեթի ծառայություններից կամ ստացել է որևէ դեղ: Իսկ միայն դեղ ստացող շահառուների թիվը 35 961 է։
Նա նշեց, որ եթե հաշվի չառնվի դեղորայքի ծախսը, ապա մեկ շահառուի ծախսը միջինում կազմել է վերջին ամիսներին 60000 դրամին մոտ գումար, նաև ընդհանուր 6 ամիսների ընթացքում փոխհատուցվել են 102.4 մլրդ դրամի ծառայություններ և դեղեր, ծախսերի մեծ մասն ուղղված է եղել թանկարժեք և վիրահատությունների իրականացման ծախսերի ծածկմանը, վիրահատություններից շատերն ուղղված են եղել մարդկանց կյանքի փրկմանը և կյանքի որակի բարելավմանը։
Պատասխանելով լրագրողի հարցին՝ նշեց, որ մինչև 18 տարեկանների դեպքում անվճար եղել են իրենց պոլիկլինիկաներում միայն որոշակի նեղ մասնագետների խորհրդատվությունները, որը ներկայումս նույնպես ապահովում է պոլիկլինիկաների կողմից: «Մենք հիմա դիտարկում ենք բոլոր այն բժշկական կազմակերպությունների տվյալները, որպեսզի հասկանանք, թե ինչ պատճառներով է համավճար կիրառվել, արդյոք դա ամրագրված է եղել տնօրենի հրամանով, ում համար են այդ համավճարները կիրառվել և այլն: Դրանից հետո բոլոր հանրային աղբյուրներով և մեր կայքէջով այդ տվյալները կհրապարակենք և հասանելի կդարձնենք մեր քաղաքացիներին: Մեր քաղաքացիների ընտրությունն է, թե իրենք որ մասնագետին կընտրեն. այն մասնագետին, որի համար կիրառվում է համավճա՞ր խորհրդատվության դեպքում, թե՞ այն մասնագետին, որի համար չի կիրառվում:
Սահմանված են կանոնները, բժշկական կազմակերպություններին հնարավորություն է տրված, որպեսզի մասնագիտացված ծառայությունների, խորհրդատվությունների դեպքում կիրառեն համավճար, բայց դրա վերաբերյալ տեղեկատվությունը պետք է լինի հասանելի քաղաքացիներին»,- ասաց Սամվել Խարազյանը։
Ինչ վերաբերում է մեծահասակների հետ կապված ահազանգերին, որ իրենցից պահանջում են համավճար՝ այն ծառայությունների դիմաց, որոնք 2 ամիս առաջ ստացել են անվճար, Առողջության համընդհանուր ապահովագրության հիմնադրամի գլխավոր տնօրենի ժամանակավոր պաշտոնակատարն այսպես արձագանքեց. «Համավճարը կիրառվել է առաջին 5 ամիսներին, սակայն այդ մասին քաղաքացիները սկսել են բարձրաձայնել սկսած հունիս ամսից: Այժմ մենք տեղեկատվությունը հավաքում ենք, դիտարկում ենք, թե համավճարի կիրառումը տնօրենների հրամանո՞վ է, երբ է հաստատվել, երբ են փոփոխությունները կատարվել: Նաև հետևում ենք սոցցանցերի հրապարակումներին, առանձին անձանց հետ ենք կապվում, փորձում պարզել հանգամանքները»։
Մանրամասն՝ տեսանյութում քիչ անց
Գոհար ՀԱԿՈԲՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: