Գույքագրվել են 250 կամրջային կառուցվածքներ, որոնց համար տրվել են կառուցման, վերակառուցման և ուժեղացման մասնագիտական եզրակացություններ
ԵՐԵՎԱՆ, 9 փետրվարի․/ԱՌԿԱ/․ Երևանում առաջին անգամ իրականացվել է կամրջային կառուցվածքների անձնագրավորում։
2025 թվականին իրականացվել է Երևան քաղաքի վարչական տարածքում տեղակայված կամրջային կառուցվածքների տեխնիկական վիճակի ուսումնասիրություն, սեյսմիկ վիճակի գնահատում և առաջին անգամ՝ անձնագրավորում։
Այս մասին այսօր Երևանի քաղաքապետարանի գործակարգավորական խորհրդակցության ժամանակ հայտնել է Շինբարեկարգման վարչության պետի պաշտոնակատար Անդրանիկ Թևոսյանը։
Նա հայտնել է, որ գույքագրվել են 250 կամրջային կառուցվածքներ, որոնց համար տրվել են կառուցման, վերակառուցման և ուժեղացման մասնագիտական եզրակացություններ, իսկ անձնագրավորման շրջանակներում ներկայացվել է յուրաքանչյուր օբյեկտի տեղադիրքը տարածության մեջ, տեխնիկական վիճակը, կառուցվածքը և ընդհանուր այլ տեղեկատվություններ։
Քաղաքապետի խորհրդական Կամո Արեյանն իր հերթին նշեց, որ յուրաքանչյուր օբյեկտ բնութագրվում է 30-40 ցուցանիշով, իսկ բարդ կառույցները (օրինակ՝ Հաղթանակի, Դավիթաշենի կամուրջները)՝ մինչև 70 ցուցանիշով։
«Սա միայն սառը գույքագրում չէ։ Այս գույքագրման հիման վրա կատարված տեխնիկական եզրակացության արդյունքում Երևանի քաղաքապետարանին ներկայացվել է ըստ հերթականության ռիսկայնության կամրջային օբյեկտների դասակարգումը, որոնք ունեն հիմնանորոգման, վերանորոգման, վերակառուցման, ամրացման կարիք», – նշեց Արեյանը։
Նրա խոսքով՝ սա կարևոր է հետագա ռազմավարական, տարեկան աշխատանքային ծրագրերը կազմելու համար։
Արեյանը տեղեկացրեց, որ ամբողջ տեղեկատվությունը նախատեսվում է տեղադրել «Թվային Երևան» հարթակում, որպեսզի այն լինի մշտապես կիրառելի։
Թևոսյանն էլ նշեց, որ Կիևյան կամրջի մասով աշխատանքները պլանավորվում է իրականացնել ամառային արձակուրդների շրջանում՝ հավաստիացնելով, որ այս պահին կամուրջը սեյսմիկ տեսանկյունից ապահով է։