ԲՀԿ առաջնորդ, գործարար Գագիկ Ծառուկյանի փաստաբանական թիմը մինչ այս պահը չի ստացել «Արարատցեմենտը» պետականացնելու, այնտեղ կառավարիչ նշանակելու վերաբերյալ որոշումը, ավելին՝ գործընթացների մասին տեղյակ չի էլ եղել, մինչդեռ Հակակոռուպցիոն դատարանն արդեն նման որոշում է կայացրել։
Այս մասին ֆեյսբուքյան իր էջում գրում է Ծառուկյանի փաստաբանական խմբից Երեմ Սարգսյանը՝ հայտարարելով, որ այսօր ՀՀ-ում իրավական անվտանգության լրջագույն խնդիր կա։ Քաղաքական հրահանգը հնչեցվում է, որից հետո իրավապահ համակարգն անցնում է այդ հրահանգի կատարմանը։ Այս անգամ Գագիկ Ծառուկյանի վերաբերյալ էին քաղաքական հրահանգներ տրվել, ու դրանք կատարվում են, թեպետ անընդհատ հայտարարվում է, որ չկա քաղաքական հետապնդում, կան իրավական գործընթացներ։
«Եթե այդ գործընթացները պետք է տեղի ունենային, պետք է տեղի ունենային անկախ քաղաքական իշխանության հրահանգների, հրապարակային հայտարարությունների։ Իսկ առկա իրավիճակը հստակ ցույց է տալիս, որ իրավապահ համակարգը գործում է բացառապես քաղաքական նպատակներով՝ քաղաքական իշխանության ցանկությունները իրագործելու համար և նրանց քաղաքական ռեյտինգը բարձր պահելու համար»,- գրում է Սարգսյանը։
Հիշեցնում է՝ հայտարարվեց, թե ընտրություններից հետո Գագիկ Ծառուկյանին թույլ չեն տալու լքել երկիրը, այդպես էլ արվեց։
«Դատախազությունն ակնհայտ ապօրինի մեղադրանք ներկայացրեց և բացակայելու արգելք կիրառվեց։ Հետո այդ մեղադրանքը հենց իրենք հաստատեցին, որ ակնհայտ ապօրինի էր»,- գրում է Սարգսյանը։
Դրան հաջորդեցին Ծառուկյանի կալանավորումը, «Արարատցեմենտի» պետականացման մասին հայտարարությունը, որոնք բոլորն էլ անոնսվել էին ՀՀ վարչապետի կողմից։
Փաստաբանի խոսքով՝ ստացվում է, որ քաղաքական իշխանության ներկայացուցիչների հայտարարություններից առաջ նման գործընթացներ անելու կարիք չկար, իսկ դրանցից հետո ամբողջ իրավապահ համակարգը արթնանում է։ Նշանակում է, որ օրենքի և իրավունքի մասին խոսելն ուղղակի ավելորդ է։
Sputnik Արմենիա