Հունիսի 24-ին Փրկարար ծառայության տնօրեն-ՆԳ նախարարի տեղակալ Արամ Ղազարյանի համակարգմամբ տեղի է ունեցել Հայաստանի Հանրապետությունում անտառային հրդեհավտանգ իրավիճակների մշտադիտարկման, հրդեհների կանխարգելման և արագ արձագանքման կարողությունների գնահատման միջգերատեսչական աշխատանքային խմբի հերթական նիստը։ Հանդիպմանը մասնակցել են շահագրգիռ պետական գերատեսչությունների, մարզպետարանների, ՆԳՆ պատասխանատու ստորաբաժանումների և ՓԾ ղեկավար կազմի ներկայացուցիչները։
2025 թվականի դասերը և մարտահրավերները Անդրադառնալով վերջին տարիների վիճակագրությանը՝ նիստի ընթացքում մանրամասն վերլուծության են ենթարկվել 2025 թվականին արձանագրված խոշոր հրդեհների դեպքերը։ Մասնակիցները գնահատել են արձագանքման գործընթացում ի հայտ եկած մարտահրավերները և դրանց հաղթահարման ուղղությամբ իրականացված աշխատանքների արդյունքները։
Արամ Ղազարյանը շեշտել է, որ հրդեհավտանգ ժամանակահատվածում գործընկեր կառույցների միջև սերտ և համակարգված համագործակցությունը հրդեհների արդյունավետ կանխարգելման կարևորագույն նախապայմանն է։
Օպերատիվ կառավարման նոր մոտեցումը. Առանձնակի կարևորվել է ահազանգերին օպերատիվ արձագանքումը, հրդեհավտանգ օրերին փրկարարական ուժերի և միջոցների նախապես տեղակայման (դիսլոկացիայի) անհրաժեշտությունը, ինչպես նաև տեխնիկական և մարդկային ռեսուրսների ճշգրիտ բաշխումը։
Հանրային պատասխանատվություն և կամավորականություն ՆԳ նախարարի տեղակալը հատուկ ընդգծել է, որ միայն պետական մարմինների աշխատանքը բավարար չէ. հրդեհների դեմ պայքարում առանցքային նշանակություն ունեն հանրային պատասխանատվությունն ու զգոնությունը։
Կառույցներին հանձնարարվել է ակտիվացնել իրազեկման աշխատանքները բնակավայրերում՝ գործընթացում ներգրավելով տեղական ինքնակառավարման մարմիններին, համայնքներին, բնակչությանը և կամավորական խմբերին։ Նախանշվել են առաջիկա անելիքները՝ միտված հնարավոր հրդեհային ռիսկերի նվազեցմանը և շրջակա միջավայրի անվտանգության ապահովմանը։