Կրեմլը հերքել է սեպտեմբերին նախանշված Պետդումայի ընտրությունները հետաձգելու վերաբերյալ քննարկումները, որոնց մասին հաղորդել է Meduza-ն։ Օրվա փոփոխության հարց չի քննարկվում, ընտրությունների նախապատրաստական աշխատանքները շարունակվում են, այսօր հայտարարել է Ռուսաստանի նախագահի մամուլի քարտուղար Դմիտրի Պեսկովը, գրում է DW-ի ռուսական ծառայությունը։
Ավելի վաղ Meduza-ն հաղորդել էր Անվտանգության դաշնային ծառայության (ԱԴԾ) ղեկավարության և Ռուսաստանի ազգային գվարդիայի ղեկավար Վիկտոր Զոլոտովի փորձերի մասին՝ համոզելու ՌԴ նախագահ Վլադիմիր Պուտինին հետաձգել առաջիկա ընտրությունները: Նրանք որպես այս որոշման պատճառ մատնանշել են վատթարացող տնտեսական իրավիճակը և «Եդինայա Ռոսիա» կուսակցության վարկանիշի անկումը, հաղորդում է լրատվամիջոցը՝ հղում անելով Ռուսաստանի նախագահի աշխատակազմին մոտ կանգնած երկու աղբյուրների:
Նրանցից մեկը նշել է, որ քննարկումները միայն «խոսակցությունների մակարդակով են», և որևէ փաստաթուղթ չի պատրաստվել։ Մեկ այլ աղբյուր հայտնել է, որ Ռուսաստանում խորհրդարանական ընտրությունները «հետաձգելու կամ նույնիսկ մոտ ապագայում չեղարկելու մասին խոսակցությունները» սկսվել են անցյալ գարնանը՝ բյուջետային խնդիրների, գների բարձրացման և ձեռնարկություններում կրճատումների պատճառով։ Նա նշել է, որ վատթարացող իրավիճակն ազդում է կառավարության վարկանիշի վրա, և ընտրությունների անցկացումը համարվում է դժվար խնդիր։
Անվտանգության խորհրդի փոխնախագահ Դմիտրի Մեդվեդևը, Սերգեյ Կիրիենկոյի գլխավորած նախագահական վարչակազմի քաղաքական բլոկը և Ալեքսեյ Գրոմովի շուրջ ստեղծված տեղեկատվական բլոկը դեմ են ընտրությունների հետաձգմանը, հաղորդում են աղբյուրները։ Սակայն Մեդվեդևը ձգտում է գլխավորել «Եդինայա Ռոսիա» կուսակցության ցուցակը և դառնալ Պետդումայի խոսնակ, մինչդեռ Կիրիենկոյի և Գրոմովի համար այս ընտրություններն իրենց նշանակության ցուցադրություն են, ասվում է հրապարակման մեջ։
Նշվում է, որ Պուտինն ինքը հրաժարվում է հետաձգել ընտրությունները՝ դրանք համարելով քաղաքական առավելություն Ուկրաինայի իրավիճակի համեմատ, որի դեմ նա լայնածավալ պատերազմ է սանձազերծել ավելի քան չորս տարի առաջ։
«Երկրորդ, ընտրությունների չեղարկումը կնշանակեր ընդունել, որ ծրագրերը խափանվել են, և իրավիճակը հրատապ է։ Բայց առայժմ մենք անում ենք ամեն ինչ, որպեսզի ցույց տանք, որ ամեն ինչ լավ է»,- հավելել է Meduza-ի աղբյուրը։
Պետդումայի, ինչպես նաև տասնյակ շրջաններում օրենսդիր ժողովների ընտրությունները նախատեսված են սեպտեմբերի 18-20-ը։ Սրանք Դումայի առաջին ընտրություններն են Ուկրաինայի դեմ լայնածավալ պատերազմի սկսվելուց ի վեր։ Առաջին անգամ քվեարկություն կանցկացվի նաև Ուկրաինայի օկուպացված տարածքներում՝ Դոնեցկի, Զապորոժիեի, Խերսոնի և Լուգանսկի մարզերում։ Ընտրություններ անցկացվել են նաև բռնակցված Ղրիմում։
Հեռավար էլեկտրոնային քվեարկությունը, որը բազմիցս քննադատվել է լայնածավալ կեղծիքների համար, կանցկացվի 33 շրջաններում։ Ընդդիմությանը գործնականում արգելված է մասնակցել ընտրություններին, իսկ պատերազմի դեմ պայքարող և ընդդիմադիր կազմակերպությունների մեծ մասին արգելված է մասնակցել:
Թարգմանությունը՝ Էմմա Չոբանյանի