ChatGPT-ի մշակող OpenAI ընկերությունը, հետևելով իր գլխավոր մրցակից Anthropic-ի օրինակին, գաղտնի կերպով ներկայացրել է հրապարակային առաջարկի (IPO, Initial Public Offering) հայտ ԱՄՆ-ում։ Սա նշանակում է, որ տեխնոլոգիական հսկան պատրաստվում է մասնավոր կարգավիճակից անցում կատարել հանրայինի, ինչը թույլ կտա ցանկացած անձի ձեռք բերել ընկերության բաժնետոմսերը։
Ընկերությունն այս մասին պաշտոնապես հայտարարել է X-ի (նախկին Twitter) իր էջում՝ կանխելով հնարավոր ինսայդերական արտահոսքերը։
«Մենք վերջերս ներկայացրել ենք գաղտնի S-1 հայտ: Մենք ակնկալում ենք, որ այդ մասին արտահոսք կլինի, ուստի պարզապես հայտարարում ենք այդ մասին», – ասվում է տարածված գրառման մեջ։
Ժամկետները դեռ հստակ չեն
OpenAI-ը շեշտում է, որ բորսա դուրս գալու ճշգրիտ ժամկետը դեռևս որոշված չէ, և ընկերությունը չի շտապում ավարտին հասցնել գործընթացը.
«Դա կարող է որոշ ժամանակ պահանջել, քանի որ մենք ցանկանում ենք որոշ բաներ անել, որոնք, ամենայն հավանականությամբ, ավելի հեշտ կլինի անել որպես մասնավոր ընկերություն», – հավելել են մշակողները:
Միլիարդների պատերազմ. Anthropic-ը գերազանցել է OpenAI-ին
Այս քայլը հաջորդում է AI շուկայում ուժերի դասավորության կտրուկ փոփոխությանը։ Օրեր առաջ Anthropic ընկերությունը ներդրողներից ներգրավեց ռեկորդային 65 միլիարդ դոլար, ինչի շնորհիվ դրա շուկայական արժեքը գերազանցեց 900 միլիարդ դոլարը: Սրա արդյունքում Anthropic-ը շրջանցեց OpenAI-ին, որի ընթացիկ գնահատականը կազմում է 730 միլիարդ դոլար։
OpenAI-ի կողմից S-1 հայտի ներկայացումը դիտարկվում է որպես ուղիղ պատասխան մրցակցին՝ կապիտալի ներգրավման և ֆինանսական գերիշխանությունը վերականգնելու նպատակով։