Հայտնի են ամառային զորակոչի եւ զորացրման օրերը
Գործադիր մարմինը վաղը կհաստատի զորակոչի շրջանակներում ԶՈՒ համալրման, ինչպես նաեւ պարտադիր զինվորական ծառայություն անցած զինծառայողների զորացրումն իրականացնելու ժամկետները։
Համալրումը կկատարվի հունիսի 29-ից մինչեւ օգոստոսի 15-ը, իսկ պարտադիր զինվորական ծառայություն անցած զինծառայողների զորացրումը կիրականացվի 2026թ. հունիսի 24-ից մինչեւ օգոստոսի 15-ը ներառյալ։
Որոշման նախագծով սահմանվում է շարքային կազմի պարտադիր զինվորական ծառայության 2026 թվականի ամառային զորակոչի կազմակերպման ու անցկացման գործընթացը, դրա շրջանակներում ստեղծվող մարմինները, զորակոչի ապահովման ուղղությամբ գործողությունների շրջանակը:
Առողջապահության նախարարությունը սահմանված հետազոտությունների եւ պատվաստումների իրականացումն ապահովելու նպատակով հանձնարարելու է իրավասու ծառայություններին՝ համապատասխան բժշկական հաստատություններին ապահովելու անհրաժեշտ քանակով պատվաստանյութերով, ռենտգեն եւ ԷՍԳ ժապավեններով, երեւակման նյութերով: Իսկ Ներքին գործերի նախարարը պետք է ապահովի հասարակական կարգի պահպանությունը Հայաստանի Հանրապետության պաշտպանության նախարարության հանրապետական զինվորական կոմիսարիատի զինվորական կոմիսարիատների եւ հանրապետական հավաքակայանի, ինչպես նաև հարակից տարածքներում։ Բացի այդ՝ իրականացնելու է զորակոչից խուսափող զորակոչիկների որոնումը ՀՀ տարածքում եւ ՀՀ տարածքից դուրս։ Երեւան քաղաքի եւ մարզերի զինվորական կոմիսարիատներից մինչեւ հանրա-պետական հավաքակայան, իսկ հանրապետական հավաքակայանից մինչեւ Երեւանի սահմաններից դուրս փոխադրող ավտոբուսների ուղեկցումն անվտանգ իրականացնելու համար ներգրավելու ՀՀ ներքին գործերի նախարարության ոստիկանության պարեկային ծառայության եւ ոստիկանության գվարդիայի ծառայողներ:
Հայաստանի Հանրապետության կրթության, գիտության, մշակույթի և սպորտի նախարարությունն էլ պետք է տրամադրի մինչեւ 2026 թվականի հունիսի 30-ը ներառյալ 18 տարին լրացող` դպրոցները, ուսումնարանները եւ քոլեջներն ավարտող, բարձրագույն ուսումնական հաստատությունների ընդունելության քննություններին մասնակցելու հայտ ներկայացրած արական սեռի քաղաքացիների անվանական ցուցակները։