ՀՀ վարչապետ Նիկոլ Փաշինյանն արձագանքել է իր հասցեին քննադատություններին, թե 2021թ. ճանաչել է Ադրբեջանի տարածքային ամբողջականությունը։
«Այսօր շատ բան են ասում, օրինակ, ասում են, որ ես 2021թ. Ադրբեջանի տարածքային ամբողջականությունը ճանաչել եմ։ Ճիշտ են ասում։ Բայց շատ կարևոր է արձանագրել, թե ինչի համար՝ որ ի վերջո այդ գիտակցումը հասունացել է, որ ցանկացած երկրի տարածքային ամբողջականությունն ուրվագծվում է իր հարևանների տարածքային ամբողջականությամբ։
Այսինքն՝ ես նախ ճանաչել եմ ՀՀ տարածքային ամբողջականությունը, և այդ հենքի վրա է հնարավոր միակ խաղաղությունը, որ կարող ենք ունենալ։ Եթե այս ուղեգծից շեղվենք, մենք ետ ենք գլորվելու կոնֆլիկտի հորձանուտն ու պատերազմները չեն ուշանա։
Այսօր պատերազմի եռագլուխ կուսակցությունից մեկն ասում է՝ ծովից ծով Հայաստան։ Ի՞նչ ծովից ծով Հայաստան, ինչո՞վ ծովից ծով Հայաստան։ Ո՞վ է զոհվելու ծովից ծով Հայաստանի համար»,- Կոտայքի մարզում նշել է նա։ Փաշինյանը որպես օրինակ մատնանշել է ԲՀԿ նախագահ Գագիկ Ծառուկյանին. «Էդ մարդը, որի նկարն էլ այդտեղ կախված է, իր ընտանիքի ոչ մի անդամ ՀՀ սահմանի անվտանգության համար մի կրակոց նույնիսկ չի արձակել։ Եթե նրանք կրակել են, կրակել են՝ Աբովյանում, Առինջում, Կոտայքի մարզում, սեփական երկրի քաղաքացիների դեմ։ Էսօր եկել, ծովից ծով Հայաստան են խաղացնում»,- նշել է նա։