ՀՀ ԱԺ առողջապահության հարցերի մշտական հանձնաժողովի հերթական նիստի օրակարգում Դեղերի մասին օրենքում փոփոխություններ եւ լրացումներ կատարելու մասին ՀՀ օրենքի նախագիծն էր, հիմնական զեկուցողը՝ ՀՀ առողջապահության նախարարի տեղակալ Աստղիկ Գրիգորյանը:
Նա ասաց, որ նախագծի նպատակն է բացառել դեղերի շրջանառության կարգավորման ոլորտում առկա տարընթերցումները, ներդնել դեղերի որակի անվտանգության, մատչելիության ապահովման եւ վերահսկողության իրականացման առավել հստակ եւ ԵԱՏՄ կանոնների հետ ներդաշնակ գործիքակազմ: Նախարարի տեղակալը նշեց, որ մասնավորապես առաջարկվում է բնակչության առողջապահական առաջնահերթ կարիքները ապահովելու նպատակով ընդլայնել բժշկական օգնություն եւ սպասարկում իրականացնող կազմակերպություններում իրենց կողմից ծառայությունների ապահովման նպատակով արտադրվող դեղերի ցանկը, որոնց համար ԵԱՏՄ կանոնների համաձայն գրանցում չի պահանջվում:
«Նախագծի ընդունումը նաեւ հնարավորություն կտա նախարարությանը թույլատրել գրանցում չունեցող, սակայն հիմնական դեղերի ցանկում ընդգրկված, ինչպես նաեւ ուռուցքաբանության մեջ կիրառվող դեղերի ներմուծումը, քանի որ ՀՀ-ում միայն գրանցված դեղերի առկայությունը հնարավոր չէ ապահովել: Բազմաթիվ են դեպքերը, երբ դեղը երկարաժամկետ չի ներմուծվում եւ կարիքի դեպքում առկա չի լինում շուկայում…»,-մանրամասնեց Աստղիկ Գրիգորյանը:
Նաեւ հավելեց, որ չգրանցված դեղերի ռիսկերը նվազեցնելու նպատակով առաջարկվում է ընդլայնել ներմուծման հավաստագրի տրամադրումը մերժելու հիմքերը: Նախագծով առաջարկվում է հստակեցնել լիցենզիաների տրամադրման եւ կասեցման հիմքերը, ընդլայնել լիցենզավորող մարմնի իրավասությունները. «Դա հնարավորություն կտա՝ շրջանառելով դատական գործընթացները՝ դադարեցնել լիցենզիան նաեւ պատշաճ արտադրության գործընթացը հավաստագրի գործունեության իրականացման դեպքերում»:
ՀՀ ԱԺ «Հայաստան» խմբակցության պատգամավոր Արմենուհի Կյուրեղյանը հարցրեց նախարարի տեղակալից՝ եթե նախագծի անհրաժեշտության հիմքում դնում են ԵԱՏՄ կանոնների հետ ներդաշնակեցումը, սակայն մայիսի 28-29-ին Աստանայում, որտեղ ԵԱՏՄ բարձրագույն խորհրդի նիստն է, ըստ հայտարարությունների՝ պետք է քննարկվի այդ կազմակերպությունում Հայաստանի կարգավիճակի հարցը, ինչու ենք մենք գնում ԵԱՏՄ պահանջները կատարելուն, եթե ինքներս հստակ չգիտենք՝ մնո՞ւմ ենք ԵԱՏՄ-ում, թե՞ ոչ, կամ գուցե գիտենք, որ մնում ենք, դրա համար էլ այսպես միարժեքորեն օրենքի փոփոխությունը բերում ենք: Պատգամավորը խնդրեց հիմնավորել դա:
Կյուրեղյանի մյուս հարցը վերաբերում էր դեղապահովման ծրագրին: Նա նշեց, որ առողջության ապահովագրության առաջին եռամսյակի պակասը լրացնելու համար 2,9 մլրդ դրամ ենք ավելացրել, որից 2,5 մլրդը պահուստային ֆոնդից, եւ այսօր բյուջեի երրորդ եւ չորրորդ եռամսյակում դեղապահովման ծրագրում ունենք զրո դրամ: Պատգամավորը խնդրեց պարզաբանել՝ արդյոք այդ զրո դրամը լրացվել է, եթե այո՝ ինչի հաշվին:
Առաջին հարցվի վերաբերյալ նախարարի տեղակալն ասաց, որ դրա պատասխանը իր իրավասության շրջանակներից դուրս է. «Սակայն, ինչ որոշում էլ կայացվի, որոշակի ժամանակ է պետք այդ ամենն իրականացնելու համար, ինչը նշանակում է, որ գործընթացը պետք է անխափան շարունակվի, նկատի ունենք դեղերի մատակարարումը, դեղերի մատուցումը եւ հիվանդների սպասարկումը: Դրա համար, բոլոր դեպքերում, տվյալ պահին այս օրենքի կետերից մեկը ԵԱՏՄ-ին հարմարեցնելն է, բայց որպեսզի կարողանանք անխափան մեր գործունեությունն ապահովել, իրականացնում ենք այս փոփոխությունները՝ ավելի որակյալ բուժսպասարկում ապահովելու համար: Թե հետագայում ինչ կորոշվի, ըստ դրա կհարմարեցվի մնացածը»:
Հաջորդ հարցի հետ կապված էլ Աստղիկ Գրիգորյանը նշեց. «Դա այս պահին այս օրենքի մեջ չէ, մեր քննարկման թեմայից մի քիչ դուրս է, ձեզ հետագայում կպատասխանենք: Ապահովագրության հետ կապված ծախսերը չեն մտնում մեր այսօրվա օրակարգի մեջ»:
Տեսանյութն՝ ավելի ուշ:
Գոհար ՀԱԿՈԲՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: