ՀՀ նոր սահմանադրության տեքստը պատրաստ կլինի առաջիկա կիսամյակում։ Այս մասին տարեկան ամփոփիչ ասուլիսի ժամանակ ասաց ՀՀ արդարադատության նախարար Սրբուհի Գալյանը։
«Մեր առաջիկա առաջնահերթություններից է նոր սահմանադրության տեքստի վերջնականացումը։ Դա ակնկալվում է իրականացնել առաջիկա կիսամյակի ընթացքում։ Մեր աշխատանքների ամփոփման ամիսը շարունակում է մնալ մարտը, մենք չենք շեղվելու իմ նշած ժամկետներից։ Այդ ժամանակ կունենանք տեքստ, որը հրապարակման ենթակա կլինի»,- նշեց Գալյանը։
Գալյանը նշեց նաև, որ Սահմանադրության փոփոխության հանրաքվեի անցկացման հետ կապված կոնկրետ ժամկետ այս պահին չկա։ «Մենք ունենք արգելք՝ խորհրդարանական ընտրությունների ու հանրաքվեի միաժամանակյա անցկացման հետ կապված։ Սահմանադրության փոփոխության հանրաքվեն կկազմակերպվի ընտրություններից ուշ, բայց չգիտենք` երբ։ Դա կլինի այն ժամանակ, երբ հասկանանք, որ տեքստը բավարար չափով հանրության հետ կոմունիկացված է»,- ասաց նախարարը։
Հիշեցնենք, որ 2025-ի մարտի վերջին Փաշինյանը հայտարարել էր, որ Հայաստանի իշխանությունները նախատեսում են 2027 թվականին անցկացնել նոր Սահմանադրության ընդունման հանրաքվե։ Միաժամանակ վարչապետը հավելել է, որ իր թիմում կարծիք է հնչում 2026 թվականի խորհրդարանական ընտրություններին զուգահեռ հանրաքվե անցկացնելու նպատակահարմարության մասին։ Այն ժամանակ Փաշինյանը պնդում էր, որ Սահմանադրության փոփոխությունը բացառապես ներքին քաղաքականության հարց է, բայց դա չի կարող չունենալ «տարածաշրջանային և միջազգային ազդեցություն»։ Արդեն ապրիլին նա խորհրդարանում ասել էր, որ նոր Սահմանադրության մեջ չպետք է հղում լինի հռչակագրին։
Իր հերթին Ադրբեջանը համառորեն պնդում է Հայաստանի կողմից Սահմանադրության մեջ փոփոխություններ կատարելու մասին՝ պատճառաբանելով, որ դրանում Լեռնային Ղարաբաղը Հայաստանի Հանրապետության հետ միավորելու ուղղակի կոչեր կան:
ՀՀ-ում հարցվածների միայն 12%-ն է պատրաստ կողմ քվեարկել Սահմանադրության փոփոխությանը
Իսկ 2025 թվականի նոյեմբերի 19-ին Թուրքիայի ԱԳ նախարար Հաքան Ֆիդանը հայտարարեց, թո հայ-թուրքական սահմանը կբացվի միայն Հայաստանի Սահմանադրության մեջ փոփոխություններ կատարելուց հետո։ Երկու օր անց Հայաստանի վարչապետ Նիկոլ Փաշինյանը հայտարարեց, որ 2026 թվականի ընտրություններից հետո Հայաստանը պետք է փոխի Հիմնական օրենքը (Սահմանադրությունը)։