Նախարարը մանրամասնել է առողջության ապահովագրությունից օգտվելու քայլերի հաջորդականությունը
ԵՐԵՎԱՆ, 30 հունվարի․/Նովոստի–Արմենիա/․ ՀՀ առողջապահության նախարար Անահիտ Ավանեսյանն ԱԺ–ում Առողջության համընդհանուր ապահովագրության համակարգի գործարկման ընթացքի վերաբերյալ քննարկման ժամանակ մանրամասնել է քայլերի հաջորդականությունը, որոնց միջոցով քաղաքացիները կարող են օգտվել ապահովագրական փաթեթից։
Նախարարի խոսքով՝ 1-ին քայլով քաղաքացին նախ պետք է պարզի իր կարգավիճակը՝ արդյոք ինքն ապահովագրված է, թե ոչ։
«2026 թվականի դրությամբ սահմանված են քաղաքացիների հստակ խմբեր, որոնց ապահովագրավճարը (տարեկան 129 600 դրամ) վճարվում է պետական բյուջեի հաշվին», – նշեց նախարարը։
Ավանեսյանի խոսքով, պետության կողմից ապահովագրվող խմբերն են՝ մինչև 18 տարեկան անձինք, 65+ տարիքի անձինք, 18-65 տարեկան 1-ին, 2-րդև 3-րդ խմբի հաշմանդամություն ունեցողներ կամ ֆունկցիոնալության գնահատման համապատասխան կարգավիճակ ունեցողներ, սոցիալական անապահովության 28+ բալ ունեցող ընտանիքներ, զոհված զինծառայողների ընտանիքի անդամներ։
«Այստեղ պիտի 2 հանգամանք միաժամանակյա լինի․ դա ՀՀ քաղաքացի և ՀՀ-ում ռեզիդենտություն ունենալու հանգամանքն է։ Ռեզիդենտությունը ՀՀ-ում 183 օր և ավելի բնակվելու հանգամանքն է», ասաց Ավանեսյանը։
Նրա խոսքով՝ ապահովագրավճար վճարողների մյուս խմբում այն անձինք են, որոնք 2025թ. նոյեմբերին ստացել են 200,000 դրամից ավել աշխատավարձ կամ հանդիսանում են ԱՁ-ներ, որոնց 2025թ. շրջանառությունը գերազանցել է 2,400,000 դրամը։ Երկրորդ քայլով պետք է ներբեռնել ArMed հավելվածը, անցնել նույնականացում, հաստատել պայմանները և համաձայնություն տալ ապահովագրական փաթեթի պայմաններին։
«3-րդ քայլով, երբ քաղաքացին արդեն ունի ակտիվ կարգավիճակ Armed-ում և ունի առողջական գանգատներ, գործում է 2 դեպք․ եթե դա անհետաձգելի բուժօգնություն է, այսինքն՝ ունենք իսկապես շտապ օգնության կարիք, դիմում ենք առաջինը շտապ օգնությանը կամ հիվանդանոց, և այստեղ ձեր ապահովագրական փաթեթի մեջ ներառված ծառայությունները արդեն գործարկվում են», – ասաց Ավանեսյանը։
Նախարարի խոսքով՝ եթե մարդը շտապ օգնության կամ հրատապ անհետաձգելի բուժօգնության կարիք չունի, ապա նա գնում է պլանային պոլիկլինիկա կամ ամբուլատորիա ընտանեկան բժշկի, թերապևտի կամ մանկաբույժի մոտ, և նրանք ուղղորդում են անձին բուժօգնության ճիշտ տրամադրման ձևաչափով։
Ավանեսյանը հայտնեց, որ հավելվածը քաղաքացուն տալիս է նաև հնարավորություն՝ տեսնելու, թե որ ծառայություններն են ներառված փաթեթում, ինչպես նաև այն բժշկական կենտրոնների ցանկն ու հասցեները, որոնք մատուցում են անհրաժեշտ ծառայությունը։
ՀՀ-ում առողջության պարտադիր ապահովագրության համակարգի մասին
2026 թվականին՝ առողջության համընդհանուր ապահովագրության համակարգին անցնելու առաջին փուլում (2026-2028), ապահովագրված կլինի 1.7 միլիոն ՀՀ բնակիչ։ Նրանց թվում են 18 տարեկանից փոքր և 65 տարեկանից բարձր անձինք, ինչպես նաև հաշմանդամություն ունեցող անձինք և սոցիալական նպաստներ ստացողները։ Այս անձանց համար պետությունը կծածկի ծախսերի 100%-ը։ Այս համակարգը կներառի նաև 190,000 աշխատող քաղաքացու, որոնց ամսական եկամուտը գերազանցում է 200,000 դրամը։ Առողջության ապահովագրության փաթեթի արժեքը կկազմի տարեկան 129,600 դրամ, որը կվճարվի ամսական։
Ապահովագրությունը կծածկի ամենապահանջված ծառայությունները, այդ թվում՝ ամբուլատոր բուժօգնությունը, կլինիկա այցելությունները, ընտանեկան բժշկի այցելությունները, մասնագետների խորհրդատվությունները և տարեկան որոշակի քանակությամբ լաբորատոր հետազոտություններ։ Ծառայությունների ցանկը կընդլայնվի և կհստակեցվի՝ ներառելով որոշակի վիրաբուժական միջամտություններ, այդ թվում՝ ակնաբուժական (կատարկտ), սրտանոթային և այլն։
2026 թվականի բյուջեով առողջության ապահովագրության համակարգի ներդրման համար հատկացված է 127 միլիարդ դրամ։